Têgêrayîşê Kulturî yê Hîlala Zêrîne Rojawan de giranîye dano perwerdeyê cinîyan û domanan ser, mîyanê şaranê Rojawanî de huner û kulturê cinîyan vila keno.

Têgêrayîşê Kulturî yê Hîlala Zêrîne 2016 de Qamişlo de xo rêxistin kerd. Nameyê Hîlala Zêrîne ser o konferansê 2020î de birî ameyî girewtene. Hîlala Zêrîne xo kantonanê Qamişlo, Hesekê, Şehba û Kobanê de rêxistin keno û binê sîwana ci de komîteyê Çapemenî-Arşîv, Perwerde û Dîplomasî est ê. Merkezanê ci de zî xeylêk karê kulturî yê sey muzîk, tîyatro, govende û resimî yenê kerdene.

Têgêrayîşê Kulturî yê Hîlala Zêrîne seba fîlm, sînema û studyoyî emser gamêke eşte. Heman wextî de têgêrayîş domananê 6-15 serran rê perwerdeyê govende, tîyatro û resimî dano.

Endama Koordînasyonê Têgêrayîşê Kulturî ya Hîlala Zêrîne Fewaze Mihemed pare kerd ke Hîlala Zêrîne vera qirkerdişê kulturî xo rêxistin kerd û armanc keno ke şarê ke ameyê asîmîlekerdene bîyaro hişê xo ser.

Fewaze Mihemed vat: ''Vera serdestîya camêrdan bi taybetî cinîyî nêeşkenê hunerê xo bikerê malê komelî. Şorişê Rojawanî reyde xêrê fikr û felsefeya Rayber Apoyî ra cinîyan firsend dî ke xo bidê şinasnayene. Cinîyî nika bi rehetî vejîyenê sehne ser, hunerê xo pêşkêş kenê. Hîsê ke bi serran cinîyî tira bêpare bîyê bi rayîrê hunerî newe ra afirîyenê. Cinîyî bi rayîrê kultur û hunerî hîsanê xo danê zanayene.

Erko verên ê Hîlala Zêrîne perwerde yo. Pawitişê kulturî bi cinîyan ê rêxistinbîyayeyan beno. Ma nêzdî ra pêro çalakîyanê Hîlala Zêrîne de eleqedar benê. Cinîyê nerêxistinbîyaye û bêperwerdeyî yenê manaya komelo bêperwerde û nerêxistinbîyayeyî. Key mezgê cinîyan vurîyê mezgê komelî zî vurîyeno. Ma perwerdeyê domanan rê zî giranîye danê. Domanî eke pê kulturê xo pîl bibê eşkenê kulturê xo bipawê. Seba ke domanî bieşkê bi hawayêkê raştî pîl bibê perwerdeyê ma yê kulturî est ê. Ma xîret kenê ke no perwerde xurt bibo.''