Çarçewa Festîvala Elewîyan a Brîtanya ya 11. de ya ke bi şîarê 'Haştîye û Edaletî' yena kerdene, Cemxaneyê Londonî de narey kayê tîyatroyî 'Ez Bi Rehetî Nêmirenê' ame mojnayene.

Kay hetê huqûqnasê kurdî Alî Hasî ra nusîyayo û tede şaîrê pîlî Ahmed Arîf û Cemal Sureya yenê qalkerdene.

Hemsereka Cemxaneyî Fîlîze Koç û temsîlkarê rêxistinanê demokratîkan zî tede xeylêk kesan kayê tîyatroyî seyr kerd. Kay de Goktay Tosun karakterê Cemal Sureya û Cuneyt Yalazî zî karakterê Ahmed Arîfî kay keno. Nesîmî Kaygusuz dîrektorîya kayî keno, Vedat Yildirim û Cansune Kuçukturk zî muzîkê kayî viraştî.

Kay zereyê yew vagonî de pê raywanîya Sureya û Arîfî dest pêkeno. Na raywanîye heman wextî de bena yew têrîameyîş. Kay de qala serebûtanê ê çaxî yê Kurdîstanî, dormeyê çep û şorişgêrî zî yena kerdene. Kay de Cemal Sureyayo ke keyeyê ci surgunanê Terteleyê Dêrsimî ra yew bi, kesayetê ci yê dejinî û nasnameyê ci yê asîmîlekerdeyî yeno vindeno.