Tîyatroyê Şaristanî yê Amedî pê kayê Don Kîxotî yo ke Don Kişotê Miguel de Cervantes Saavedrayî ra açarnayo kurdkî dest pê turneyê Ewropa kerd.Kayo ke 9ê nîsane de Tîyatroyê Gorki yê Berlinî de ame kaykerdene raştê eleqaya pîle ame.

Kayê Don Kîxotî de kaykerdoxê sey Ozcan Ateş, Şahabettîn Dag, Berfîne Emktar, Dîcle Guneş Yavuz, Ozkan Şeker û Şîlan Alagoz rolanê esasan kay kenê.

Kaykerdoxanê kayê Don Kîxotî ra Berfîne Emektar eleqaya kayî rê keyfweşîye xo ard ziwan û vat: ''Roja ma de hinî cinîyê kurdî Don Kîxot ê. Don Kîxot şovelyeyanê camêrdan vejeno werte la kayê ma wina avêr nêşino. Ma zanê ke mîyanê şovelyeyanê kurdan de cinîyî zî est ê. Ma waşt ê romanî goreyê mîtolojî û dengbêjîya kurdan îfade bikerê.''

Kayê Don Kîxotî çarçeweya turneyê Ewropa de 10ê nîsane de Hamburg, 12ê nîsane de Essen, 14ê nîsane de Koln, 15ê nîsane de Frankfur, 16ê nîsane de Antwerpen de û 17ê nîsane de do Amsterdam de bêro kaykerdene.