Çarçewaya Festîvala Kultur û Xoza ya Munzurî de vizêr Parka Mamekî de konser ame dayene.  Hemsereka Pêroyî ya DBP Çîgdeme Kiliçgun Uçar, wekîla bajarî Aytene Kordu, Hemşaredarê Dêrsimî Birsene Orhan û Cevdet Konak, Serekê Pêroyî yê Federasyonê Komleyanê Dêrismî (DEDEF) Ali Riza Bilir, temsîlkarê partîyanê sîyasîyan û rêxistinanê komelê sîvîlî û bi seyan kesî tewrê ci  bîyî.

Verê konserî Serekê DEDEFî Ali Riza Bilirî qiseykerdişêko kilm ker û bale ante ser ke Festîvala Munzurî vera înkar û asîmîlasyonî yena kerdene û vat Festîvala Munzurî festîvalêka şorişgêr a.

Badê qiseykerdişê Bilirî hunermend Baran Saltik û Mîkaîl Aslan vejîyayî sehneyî ser û deyîrê xo vatî.

Dima ra Hemşaredara Dêrsimî Birsene Orhan qisey kerd. Orhane vera destsernayîşê Şaredarîya Colemêrgî hêrsê xo ard ziwan û vat: '2Şaredarîyî yê şarî yê, ma do destûrê destsernayîşî medê.''

Hemşaredarê Dêrsimî Cevdet Konakî zî vist vîrî ke şarê kurdî Lozan de ame çînhesibnayene û waşt wa heqê şarê kurdî yê demokratîkî bêrê naskerdene.

Wekîla DEM Partî ya Dêrsimî Aytene Kordu zî vat: ''Ma vera hêrişê serê bawerî, nasname û ziwanê xo vindertî. Na herre bedelê girdî dayî. Ma milê xo çewt nêkerd, ma tîya de yê  ma do tim sereberz xover bidê.''

Hemsereka Pêroyî ya DBP Çîgdeme Kiliçgun Uçar zî nê vatî: ''Îqtîdar wazeno bi polîtîkayanê şer, tecrîd û qeyûmî rejîmê ke neweyî înşa bikero. Nê rejîmî de cayê cinîyan, ciwanan û êyê ke AKPyî rê bîat nêkenê çîn o. Îmrali de çareserîya demokratîke yena tecrîdkerdene. Îqtdaro ke nêeşka kurdanê Vakurê Kurdîstanî sero tesîr bikero, Başûrê Kurdîstanî de şer keno. Ma do destûr medê na seserre zî bibo seserra şerî.

Polîtîkaya şerê taybetî tewr zaf Dêrsim de yena rayraberdene. Ciwananê ma rê ajanîye yena ferzkerdene û bi madeyê kungkerdişî yeno waştene ke wa erjanê ci ra bêrê raqilnayene. Ma destûr medê qeyûm û polîtîkayanê şerê taybetî. Ma bi rêxistinbîyayîşî ciwananê xo bipawê.''

Temsîlkaranê partîyanê sîyasîyan zî qiseykerdişdanê xo de qala muhîmîya têkoşînê hemparî kerd.