Hozan Zinar pê eseranê xo yê serê têgêrayîşê azadîye tarîxê hunerî yê kurdan de wayîrê cayêkê taybetî yo. Deyîra 'Bîz Apo'ya Soz Vermişiz' ra ber ey mîyanê Koma Berxwedanî de deyîrê sey 'Şîrîne Kurdistan', 'De bimeş', 'Mendo Têye', 'Çemê Mûşê' û 'Mûnzûr Çayi' vatî û pê nê deyîran zerrîya kurdan qezenç kerde.

Hozan Zinar hema 16 serre bi têgêrayîşê azadîye şinasna. O 1954 de dewa Sagirkaracaya ya qezaya Ekecîkî ya Aksarayî de mîyanê keyeyêkê kurdî de dadîya xo ra beno. 1972 de keyeyê ey koçê şaristanê Amsterdamî yê Hollanda kerd. Hozan Zinarî 18 serrîya xo de Fabrîkaya Fordî de dest pê karî kerd û mîyanê sendîkayan de zî tewrê têkoşînî bi.

Ey 1976 de Komeleya Yewîya Karkeranê Tirkîyayîjan a Hollanda (HTIB) de dest pê karanê hunerî kerd û bi nameyê 'Hozan Harabî' tewrê konser bi. Destpêkê serranê 1980an de derheqê babeta kurdan û kurdîstanijan de endamanê HTIByî nîqaşê giranî kerdî. Hozan Zinarî naye ra dima têkilîya xo ya bi nînan birnaye.

Hozan Zinarî 1981 de şaristanê Den Haagî yê Hollanda de çalakîya şermezarkerdişê Darbeya 12ê Êlule de seba kadroyê PKKyî Salîh Kendalo ke 1979 de Sêwrege de şehîd bibi, deyîra 'Lo Saliho' vat û bi nê hawayî tewrê têkoşînê azadîye bi.

Ey embazanê xo reyde 1982 de Merkezê Kulturê Kurdan ê Amsterdamî awan kerd û 1983 de Huner Kom de cagirewt.

Hozan Zinar 1989 de şi Akademîya Mahsum Korkmazî ya Gelîya Bekaa û Rayberê Şarê Kurdî Abdullah Ocalanî ra perwerdeyo îdeolojîk girewt. Wextê perwerdeyî zî şarapnelî ra lingê xo yê raştî ra birîndar bi. Lingê xo ra nêeşka bibo gerîla coka agêra Ewropa.

Hozan Zinarî xeylêk çalakîyanê Ewropa de tewr vernî de cagirewt, morê xo da binê xeylêk berheman.

2004 de Hozan Zinar pê kanserî kewt la reyna zî karê sîyasî û hunerî heta peynî ardî ca. Tewr peyên 15ê sibata 2010î de şaristanê Strasbourgî yê Fransa de tewrê çalakîya vera Komployê Mîyanneteweyî bi. Gulana 2011î de dima ke babîyê ey dinyaya xo bedilnaye gonîye rijîyaye serê mezgê ci.

Hozan Zinaro ke babîyê çar domanan o, Amsterdam de 3 hewteyan nêweşxane de mend la 29ê gulana 2011î de dinyaya xo bedilnaye. Hozan Zinar Ekecîk de ame definkerdene.