Bajarê Aurichî yê Almanya de 60 wendekaran ke serkêşîya Meclîsê Cinîyan ê Şehîde Zelale de 6 mengî  perwerdeyê ziwanê kurdkî û muzîkê kurdkî girewt, vizêr sertîfîkayê xo girewtî.

Kursê ke kanûna 2024î de dîyayî destpêkerdene  44 kesî tewrê kursê kurdkî bîyî û 16 kesî zî tewrê  perwerdeyê muzîkê kurdkî bîyî. Kursê kurdkî hetê Mamoste Serhed Rewanduzî ra û kursê muzîkî hetê muzîsyen Lokman Yamanî ra ame dayene.

Merkezê Komelê Demokratîkî yê Kurdan ê Aurichî de merasîmê mezûnîyetî ame kerdene. Domanî pîya bi keyeyanê xo tewrê merasîmî bîyî.

Mamoste Serhed Rewandûzî ke merasîmî de qisey kerd nê vatî. ''Ganî kurdê ke dîaspora de ciwîyenî wayîrê ziwanê xo bivejîyê. Tîya wezîfeyo pîl yê dayîke û babîyan o. Ziwanê ma nasname û ameyoxê ma yo. Ganî her kes tewrê nê kursî bibo.''