Dewa Tanerî ya qezaya Xozatî ya Dêrsimî de rayberîya koma tîyatroyî Arêyê Kayî de Roşanê Gaxanî (pêşwazîkerdişê serra newîye) bi aktîvîteyêke ame fîrazkerdene. Hunermendê tîyatroyî yê Dêrsimî û şar zî tewrê aktîvîte bîyî.

Qezaya Bornova ya Îzmîrî de rayberîya Komeleya Dêrsimijan a Bornova de Roşanê Kal Gaxanî ame fîrazkerdene.

Şayîye de Serekê Komeleya Dêrsimijan Bariş Çelîkî derheqê Gaxanî de agahîyî dayî û vat: ''Na menge de serra newîye pê rîtuelanê Gaxanî yena pêşwazîkerdene û serra peyêne yena oxirkerdene. Gaxan roja 22ê kanûne de dest pêkeno û 20ê çeleyî de qedîyeno. Gaxan de keyeyî yenê pakîkerdene, dîyarîyî yenê dayene zeyîyan.''