Yewîya Keyeyan ê Kurdîstanijan (Yekmal) a ke Berlin de wayîrê kreşan a ke kurdkî û almankî perwerde danê seba kreşê neweyî Hamburg de zî muracat kerd. Kreşanê Yekmalî yê Berlinî de serra 2015î de 25 domanan perwerde dîyêne. Serra 2018î de eleqeyê zêdêrî ra hûmara domanan bîye 45 û kreşo diyîn ame akerdene. 

Koordînatora Yekmalî Gunaye Darici da zanayene ke ê seba ke Hamburg de kreşê kirdkî-kurmanckî abikerê xebate kenê. Gunaye Darica îfade kerd ke ê armanc kenê dibistanêke abikerê ke heta sinifa 10. kurdkî-almankî ders bida (Bilinguale Gemeinschaftschule) û seba naye dest pê amadekarîye kerd.

Gunaye Darici derheqê babete de wina qisey kerd: ''Seba ke kurdkî sey ziwananê bînan sey ziwanê koçberan bêro qebulkerdene ma xîret kenê. Ganî dezgehê kurdan ê bînan ê Almanya zî na babete de paştî bidê ma. Ziwanê ma nasname, estbîyayîş û zengînîya ma yo. Ma 26 serran ra nata Almanya de şêwirmendîya keye û perwerdeyî kenê. Nê xebatî bi kirdkî (zazakî-kirmanckî), kurmanckî û sorankî yenê kerdene. Bi nê hawayî hem hemwelatîyanê ma rê warê îstîhdamî yeno akerdene hem zî xebatê ma benê zengîn.

Cigêrayox, ziwannas û Berpirsîyarê Akademîya Yekmalî Şerîf Derînce zî serrêke ra nata Yekmal de perwerde dano. Derînceyî armancê xo wina îfade kerdî: ''Ma armanc kenê ke ziwan û kulturê kurdan ser o cigêrayîşan bikerê, na çarçewe de perwerde bidê keye û domanan, seba ke polîtîkayanê umûmîye bêrê eşkerakerdene paştî bidê dezgehan û kurdan seba daxîlbîyayîşê nê prosesî teşwîq bikerê.''

Derînceyî ard ziwan ke kurmanckî zaf vernî de yo la ê seba sorankî û kirdkî zî xebatan kenê. Derînceyî pare kerd ke ê hedef kenê ke pêro Ewropa de xebatanê xo bikerê.