Ziwannas Zana Farqînîyo ke ronayoxanê Enstîtuyê Kurdî yê Îstanbulî ra yew o, hema zî kurdkî ser o xebatanê xo rê dewam keno. Farqînî serra 2000î ra nata xebata Ferhengê Kurdkî keno. Farqînî derheqê kurdkî, tedayanê serê kurdkî û averberdişê kurdkî de Ajansê Mezopotamya rê qisey kerd. 

Farqînîyî pare kerd ke kurdkî bi serran o maruzê tedayan bena û dewleta tirke hînî welatanê bînan de zî xebatanê serê kurdkî asteng kena. Farqînîyî vat: ''Dersê kurdkî yenê qedexekerdene, dibistanan de îdareyî bi bahaneyan dersan anêkenê.''

Farqînîyî vist vîrî ke bi taybetî xîretê Darbeya 15ê  Temmuze ra dima dezgehê kurdan ameyê qefilnayene û tedayê vera kurdkî zêdîyayê. Farqînîyî vat: ''Wexto ke çew kurdkî qisey bikero yeno kiştene zî. Eke ti kurd be cade to rê vanê terorîst û krîmînalîze kenê.''

Farqînîyî îfade kerd ke yew ziwan hetê doman û ciwanan ra yenp pawitene û vat: ''Hêdî hêdî keyeyan de tirkî yena qiseykerdene. Eke kurdkî yena qedexekerdene o çax ganî ma wayîrê ziwnaê xo vejîyê. Eke kurdî nêbê kurdkî zî nêbena. Ziwanê ma estbîyayîş û rûmetê ma yo. O çax ganî ma ziwanê xo gandar verdê. Seba ke yew ziwan aver şoro û mende bibo alfabe, gramer û ferheng lazim ê. Ziwan yew xazîne ya. Eke ziwan bimiro her çî destî ra şino. 

Dewlete  çira kurdkî kena qedexe? Çunke zanena ke ziwan çend girîng o. Dewlete ziwanê kurdkî ra tersena coka kena ke ey qedexe bikera.''