Xebatê kultur û hunerî yê Reqa wayîrê tarîxêkê qedîmî yê û no tarîx dima ke şaristan hetê QSDyî ra destê DAÎŞî ra ame xelisnayene gandar bi. Hetkarê Hemserekê Komîteya Kultur û Hunerî ya Reqa Menaf Ek Musayî zulmê wextê Baasî, hêrişê DAÎŞî û xebatê kulturî yê nikayênî yê Reqa ANFyî rê ercnayî.

Merkezê Kultur û Hunerî yê Reqa de sey kargehê resim, tîyatro, dîwan, muzîk ûsn 11 beşî est ê û 45 endamê ci est ê. Merkez nika amadekarîye keno ke dîploma bidê wendekaranê ke perwerde bi serfîrazî qedînenê. Pêro xebatê merkezî belaş ê.

Menafî da zanayene ke merkez wextê rejîmê Baas û DAÎŞî de sey zîndanî şuxilîyayêne û vat: ''Wextê Baasî de na bîna pabesteyê îstîxbaratê rejîmî bîye û DAÎŞî bîna bi temamî vurnaye zîndanî. Ma bi hetkarîya Meclîsê Sivîlî bîna tamîre kerde û 31ê nîsana 2019î de bîna sey merkezê hunerî akerde.

Wextê hêrişanê DAÎŞî de OSO muzeyê ma talan kerd, berhemê tarîxî diznayî. Cerganê DAÎŞî zî zeraro tewr pîl da merkezî û têna dêsî verdayî. Ma ancax yew-di berhemê muzeyî pawitî. DAÎŞî o çax pêro karê kultur û hunerî qedexe kerdêne. DAÎŞî rehet nêdayêne hunermendan û dest nayêne hacetanê muzîkî û resiman ser.''

Menaf Musayî pare kerd ke dima ke Reqa destê DAÎŞî ra ameye xelisnayene înan reyna dest pê xebatanê xo kerd. Musayî vat: ''Verî ma bi tersî dest pêkerd. Ma hêverî armanc kerd ke berhemê tarîxî yê mendeyî bipawîyê. Na bîna se ra 90-95 zerar dîbî la ma bîna vurnaye na rewşe. Azadîye verê xebatanê ma akerd. Nika Reqa de her keye de kitab û hacetê muzîkî est ê, hunermendêk/e est o/a. ''