Festîvala Kultur û Xoza ya Mûnzûrî ya 19’ine ya ke emser bi şîarê ‘’Dêrsimî rê, bawerî, ziwan û kulturê xo rê wayîr vejî, biciwîye û bide ciwînayene!'' yena viraştene, vizêr dest pêkerde û do heta 28’ê menge dewam bikero.
Festîvala Kultur û Xoza ya Mûnzûrî ya ke do heta 28'ê Temmuze dewam bikero vizêr bi zîyaretê Gola Cetû û dûayan ameye destpêkerdene.
Destanê Xo Bimbarekanê Ma Ser Ra Biancenê
Çarçeweya festîvale de Meydanê Seyîd Rizayî de eşkerayîyêk ameye dayene. Pîr Zeynel Keteyo ke eşkerayîye de qisey kerd, bale ante zextanê serê Elewîyan û vat: ’’Ewro îtîqat û kulturê Elewîyan çîn hesibyenê. Goreyê îtîqatê ma her çî ganî goreyê waştişî bibo. La ewro bê waştişê ma bimbarekanê ma ser o projeyan virazenê. Kulturê ma yeno qetilkerdene. Bê destura ma çew nêeşkeno çîyêk bikero. Destanê xo bimbarekanê ma ser ra biancenê.’’
Mûnzûr Do Kizil Meherikîyo, Dêrsim Do Kizil Bimano
Festîvale bi panelê ekolojî dewam kerde. Panelo ke kuçeyê Sanatî de ame viraştene de seba vîrardişê Nûpelda û Ayazî rêz ame girewtene. Panel de muhîmîya kultur û xoza de ame qiseykerdene û ame vatene ke bi sebebo ke coğrafyaya Dêrsimî zengîn o bi projeyan wazenê ke ma nêçar bikerê. Sereyê heme ganîyan bela de yo. Ganî ma bi xurtkerdişê mucadeleyî vernîya naye bigerê. Mûnzûr do kizil meherikîyo, Dêrsim do kizil bimano.
Dêrsim Sey Vizêr Do Siba Zî Dêrsim Bo
Roja verêne ya festîvale bi konseran dewam kerde. Qiseykerdişê akerdişî Serekê Peroyî yê Heyetê Pawitişê Mûnzûrî (DEDEF) Alî Hayda Benî kerd. Benî veng da selahîyetdaran ke wa nameyê Dêrsimî îade bikerê û vat nameyê Dêrsimî sey vizêr siba zî do Dêrsim bo. Dima ra konseran bi Koroyê Domanan ê Behzat Fîrîkî dest pêkerd. Koroyî deyîrê xo semedê waye û birayî Ayaz û Nûpelda yê ke Pulur de teqayîşêk de cuya xo vînî kerde, vatî. Bado zî Erdogan Emîr, Babetna, Mîkaîl Aslan û Grûbe Vardîya vejîyayî sehne.
