Walîtîya Amedî 65 mezra û mehlayanê Licê û Hêne de qedexeyê teberîvejîyayîşî îlan kerdbi û operasyonêk dabi dest pê kerdene. Operasyon yeno domnayene.

Goreyê zanayîşan çarçaweya operasyonî de leşkerî dewijan tehdît kenî. Dewanê Çemê Elîka, Şenlîk û Akçapinar de leşkeran roja îne dewijî tehdît kerdî.

Dewa Çemê Elîka gerîyaye binê ablûqa, dekewtiş û vejîyayîş ame qedexe kerdene û dewijan rê zext ame kerdene.

DEWE ÎŞXAL KERDE!

Dewijan da zanayene ke leşkeran camî, mekteb û banê şînî de alaya tirkî aliqnayî û wesîyatanê zirxinan ra deyîrê nîjadperestî vatî.

Dewijan dîyar kerd ke sereştişê keyeyan de zî heta nika di cinîyî tepiştî û dewijî tengayî ancenî.

Dewijan arde ziwanê ke leşkeran dewe îşxal kerda, ci rê zext kenî û waşte ke vengî înan bidoyo eşnawitişî.