Menga Gulane ra nata qezaya Licê ya Amedî de hema hema her hewte qedexeyê tebervejîyayîşî yeno îlankerdene, operasyonê eskerîyî yenê viraştene. Operasyonî zafane herêmanê sey Pêşêkevir, Koçeran, Ber Çîya, Speynî û Çemê Elika de yenê viraştene. Prosesê operasyonan de erzîyeno serê keyeyan, cipersayîşê hayîdarîya pêroyîye (GBT) yeno kerdene, hemwelatijî raştê heqaret û tehdayan yenê.

'DEST DANÊ SERÊ XIDAYANÊ KE KEYEYAN DE YÊ’

Wextê îlankerdişê qedexeyê tebervejîyayîşî de wezîfedarê Şîrketê Elektrîkî yê Dîcle yê Anonîmî (DEDAŞ) zî leşkeran dir pîya yenê mehlayan, bi hawayêkê keyfîyî hema hema her keyeyî rê bi behaneyê elektrîkê qaçaxî cezayanê pereyî yê mabênê hezar û 500 û 10 hezarî birnena. Cayê ke nuqteyê kontrolî ameyê ronayene de zî şarê herême yeno mexdurkerdene. Nê nuteyan de dest dîyeno serê xidayanê şarî ke wazenê seba zimistanî berê keyeyanê xo. Zafê ê xidayê ke operasyonê eskerîyan de sey xidayê ke stargeyan de ameyê desteserkerdene ramojîyenê, zafaneyê înan xidayê nê keyeyan ê. 

'XIDAYÎ YENÊ ÎMHAKERDENE, WAZENÊ TÎYA BÊŞAR VERDÊ'

Hemwelatijê ke herême de ciwîyenê ardî ziwan ke gama wesayîtan de xida vêşî bo leşkerî dest danê ser û wina vatî: “Ma leşkeran ra vanê seba zimistanî ma vêşî gênê ke heta wisarî ma pê îdareyê xo bikerê. Ancî zî gama xidayî vêşî bê leşkerî dest danê ser. Mesela gama ke ma 4 xaşeyî ardan benê ma ra vanê ‘şima çira hende ardan benê.’ Yew yan zî di xaşeyî ardanî rê destûr danê, êyê bînan desteser kenê.”

Dewijan ard vîrî ke serranê 90an de seba ke ê bieşkê xida biyarê fîş girewtêne û nê vatî: “Nê bicaardişî ramojnenê ke ma ancî agêrayê  serranê 90an. Ma wazenê erzaqêk ke heta wisarî qîmê ma bikerê berê, la ê nêverdanê. Eke ê sereştişanê keyeyan de xidayê vêşîyî bivînê dest danê ser.”

Dewijan vat bi nê bicaardişan wazenê ke herême bêşar verdê.