Xeylî şaristananê Kurdistanî de rîyê varayîşê vewre ra û pûkî ra adeta cuye vinderta. Rîyê varayîşê vewre ra ke di rojî yê bêmabên dewam kena bi seyan cayan dir têkilî biryaye. Netîceyê vewra zafe de xeylî qezayî virazîyayî û bi desan kesî birîndar bî. Sere de şaristananê sey Wan, Colemêrg, Mûş, Bedlîs, Qers, Erdexan û Agirî xeylî şaristanan de vewra zafe varaye.

RAYÎRÊ KE XEBATÎ NÊBÎYÊ QEZAYÎ VIRAZÊNÊ

Wextê şaredarîyanê DBPyî de rixmê varayîşê vewra zafe seba ke ekîbê şaredarî xebitîyayêne rayîrî cade abîyêne. Wan, Colemêrg, Mûş, Agirî û qezayanê înan ke qeyûmî ameyê tayînkerdene de rixmo ke bi rojan o rayîrê girewte yê xebatêk nêna kerdene.

Rîyê varayîşê vewre û cemedîyayîşî ra rayîrê Wan-Erdîşî de qeza virazîyaye. Netîceyê qezaya rêzilkîye de 16 kesî birîndar bî. Şahidan vat ke 6 wesayîtî ginayê têro, 2 rojî yê ke rayîr hetê sazîya bejrayîran nêno pakkerdene û seba ke solekerdiş nêno kerdene qezayî virazênê.