Hemsereka KCDyî û parlamentera HDPyî ya Colemêrgî Leyla Guvena ke semedê wedartişê tecrîdê serê Rayberê Şarê Kurdî Abdullah Ocalanî 35 rojî yo grevê vêşanîye de ya, ci rê paştîdayîşî zêdîyenî. Wan de rixmê hêrişê polîsan newe ra çalakîyêk ameye destpêkerdene.

Wan de roja Dişemeyî polîsan eştbi çalakîya grevê vêşanîye ser û çalakwanî destbend kerdîbî. La şarê Wanî pey ser game nêeşte û ewro reyna banê HDPyî de çalakîya newî daye destpêkerdene. Bi wesîleya çalakîye eşkerayîya çapemenîye ameye viraştene. Hemserekê HDPyî yê bajarî Yadîşan Karabulake û Umît Dede, hemsereka DBPyî ya bajarî Ayla Tarhane, Mayê Aşitîye, temsîlkarê KCDyî, îdarekarê TUHAY-DERî û hemşaredarê bajarî  tewrê ci  bîyî.

WAŞTIŞÊ GUVENE WAŞTIŞÊ  MA YO ZÎ

Eşkerayîye de hemşaredara Edremîtî Rojbîn Çetîne qal kerd. Çetîne vist vîrî ke çalakîya Leyla Guvene kewta roja 35ine û va: ‘‘Tecrîd sûcê merdimîye yo. Birêz Ocalanî ser o 4 serranê peyênan de tecrîdo giran esto. Birêz Guvene zî seba ke tecrîdê vera aşitîye û demokrasî bişikno dest bi çalakîyêk kerde. Ma zî semedê paştîdayîşê Guvene dest bi grêvê vêşanîye kerd. La polîsan vizêr eşt nê çalakwanan ser ê û  destebend kerdî.  La ma rixmê hêrişan çalakîya xo rê dewam kenî. Ewro ma newe ra grevê vêşanîye yê bi 3 rojan da destpêkerdene. Waştişê Leyla Guvene waştişê ma yo.‘‘