Vakurê Kurdîstanî de kêm bo zî testanê vîrusê Korona dest pêkerd. Amed de ke nufusê xi nêzdîyê 2 mîlyon o heta nika têna 500 testî ameyî kerdene. Şirnex de zî hûmara merdimanê ke şîyê nêweşxane û gêrîyayî binê karantîna 600-700 . Riha de hûmara nêweşanê ke tede vîrusê Korona ame tesbîtkerdene 20 kes a û 3 kesan zî Korona ra wefat kerd, 150 kesî zî bi şikê vîrusê Korona nêweşxaneyan de yê. Wekîlê HDPyî ya Amedî Garo Paylanî persa ke çira 27 rojan de Amed de têna 500 testî ameyî kerdene. Hukmatî zî dekewtiş û vejîyayîşê çar şaristanan ê pîlan ê kurdan qedexe kerd û 16 şaristanan de zî asta herêmîye de karantîna îlan kerde.

Amed de hûmara hemwelatîyanê ke rîyê vîrusê Korona ra nêweşxaneyan de yenê weşkerdene zêdîyena. Nêweşxaneyanê cîyayan de weşkerdişê 148 kesanê ke tede vîrusê Korona ame tesbît kerdene dewam keno. Servîsê ciewnîyayîşê giranî yê nêweşxaneyî de 4 nêweşî estê û rewşa weşîye ya înan xirab a. Şaristan de heta di rojî verê cû 9 hemwelatîyî vîrusê Korona ra merdî.

Hemserekê Sendîkaya Kedkaranê Xizmetan ê Komelkîyan û Weşîye (SES) yê Amedî Şîyar Guldîkenî MA reyde qisey kerd û da zanayene ke heta nika nêzdîyê 500 testî ameyî kerdene û vat: ''Labelê na hûmare zelal nîya, çunke bi xo proses zelal nîyo. Ganî hîna zêde testî bêrê kerdene.''

Şirnex de zî hûmara merdimanê ke pê şikê vîrusê Korona kewtî zêdîyena. Goreyê doneyanê Odaya Tabîban a Şirnexî şaristan de heta nika nêzdîyê 600-700 kesî binê karantîna de yê. Şirnex de testê 16 kesan pozîtîf vejîya û kesêk zî servîsê ciewnîyayîşê giranî de yo. Şaristan de ekîpmanê weşîye zî kêm ê.

Odaya Tabîban a Riha îfade kerd ke 150 kesî pê şikê vîrusê Korona şaristan de servîsanê nêweşxaneyan de yê, Mudirîya Weşîye ya Şaristanî rewşe ser o bi hawayêkê cidîyî nêvindena û şaristan de hema zî merkezê testî çin o.

Wekîlê HDPyî yê Amedî Garo Paylanî Wezîrê Weşîye Fahrettîn Kocayî ra persa ke çira 27 rojan de Amed de têna 500 testî ameyî kerdene. Paylanî persa ke gelo cîyatîye yena kerdene.

Vakurê Kurdîstanî de 7ê nîsane ra nata 16 şaristan de karantîna esta ke nameyê înan waina yê:

* Dewa Şahîntepe ya qezaya Kahta ya Semsûrê.

* Dewê Melehesen, Mêrze, Xirbesork, Cemalvêrdî, Hecîbotî, Şemê û Haciyûsûf ên qezaya Dûtaxî yê Agirî.

* Dewa Bistînî ya qezaya Çermûge, taxêka Farqînî, deweka Taştepe ya taxa Bozyer a Erxenî ya Amedî.

* Dewa Altindere û hîrê taxê qezaya Sasonî yê Êlihî

* Taxa Doşluce ya qezaya Adakli ya Çewlîgî.

* Dewa Koyûnlû yê qezaya Mûtkî, dewê Yumurtatepe, Orenlîk, Çanakduzu û Donertaş ê Tetwanî yê Bedlîsî.

* Dewa Geçîtverenî yaqezaya Mazgîrtî ya Dêrsimî.

* Dewê Mûratboynu, Eskîbaglar û Gedîktepe yê qezaya Kemahî yê Erzînganî.

* Taxa merkezî ya bajarekê Dagpinar, dewa Turkmeşe ya qezaya Dîgorî, dewa Erdagi ya qezaya Susuzî, dewa Karabagî ya qezaya Kagizmanî û dewa Benlîahmetî ya qezaya Selîmî ya Qersî.

* Dewa Ilica ya qezaya Darnde, dewa Egnîrî ya qezaya Arapgîrî, taxa Kozdere û 5 taxê Darende, Hekîmhan, Arapgîr, Puturge û Kûlûncakî yê Meletî.

* Dewa Yetkînlerî ya qezaya Şemrexî û Dewa Derînsû ya qezaya Dêrikî ya Mêrdînî.

* Dewanê Yazla û Alagun ê Mûşî û Dewa Yuzbaşi ya qezaya Kopî.

* Dewekanê Akgeçît, Taşyaka, Kayahîsar û Kayali yê qezaya Şîrwanê û dewekê Bîndal û Ankebîr ê dewa kemetaşî ya Sêrtî

* Dewa Şenbaglarî ya qezaya Akincilar, dewê Boyali, Dîleklî, Kûrşûnlû û Yagcilar ê qezaya Koyûlhîsar, Dewan Gokçekaş û Boyalica ya qezaya Sûşehrî, dewa Uyukî ya qezaya Yildizelî, dewa Darikolî ya qezaya Doganşar û dewa Tûzlagozu yê qezaya Zara ya Sêwasî.

* 3 taxê merkezê Riha û taxêka qezaya Pirsûsî.

* Dewê Ilicak, Bellîyûrt, Esenyamaç û Ormetaş ê qezaya Elbakî, dewa Hanî ya qezaya Ebexî, dewekê Çemîk û Tellîkaya yê dewa Alacayerî yê qezaya Şaxî yê Wanî.