Dewa Oleka Corî ya girêdayîyê merkezê Bedlîsî de cenazeyê 267 kesan ê ke tarîxê cîya-cîyayan de wefat kerdo, 19’ê Kanûne 2017’î ra nat Sazîya Tibê Edlî ya Stenbolî de yenê girewtene. 443 rojî ser a derbaz bîyî la xêrca 2 keyeyan kesî seba cenazeyan muracat nêkerdo û 265 cenazeyî hîna zî ATK’î de yê.
Heta nika 32 keyeyan muracat kerdo û seba 233 cenazeyan qet muracat nêameyo kerdene. Komela Heqanê Merdiman a şaxa Tetwanî, waşt ke keyeyî muracat bikerê. Eke muracat nêro kerdene, 233 cenazeyî do goristanê bêkesan de bêrê defînkerdene.

Cenazeya Abdulhamît Donerî mezeler a ameyebî vetene û qaso ke pîyê ci Şebap Doner vano 3 mengî naye ra ver seba ke cenazeya lajê xo bigîro muracat kerdo û hîna zî netîce nêgirewto. Donerî wina qisey kerd: “Cenazeyanê domananê ma nêdanê ma. Cayê nê, hiqûqê merdimahî, hîqûqê muslumanî û wîjdanan de çin o. Goreyê qanûnan zî ganî cenazeyan bidê ma. Ez venga keyeyan dana ke wa muracat bikerê û cenazeyanê domananê xo bêwayîr meverdê.”

Goristanê Xerzanî de 267 cenazeyî ameyîbî defînkerdene û 19’ê Kanûne 2017 de, hêzanê dewlete bi makînayanê karî  goristan rijna, mezeli akerdî û cenazeyi berdî Sazîya Tibê Edlî ya Stenbolî.