Komeleya Rojnamegeran a Dîcle û Firatî (DFG) û Platformê Rojnamegeran ê Cinîyan ê Mezopotamya (MKGP)  verê Edlîyeya Amedî de seba 16 rojnamegeranê tepişteyan eşkerayîyêke daye.

Eşkerayîya hetê Vervatoxa MKGPyî Medya Uren ra ameye wendene. Eşkerayîye de ame vatene ke Tirkîya de tim rojnamegerî yenê hedefkerdene. Eşkerayîye wina dewam kena: ''Îqtîdarê AKP-MHPyî yo ke dişmenîya kurdan û çapemenîya kurdkî keno, 16ê hezîrane de 16 embazê ma tepiştî û sey delîlê sûcî zî karê înan ê rojnamegerîye mojnayî. Nê embazê ma bi îdîaya 'endamîya rêxistine' pê 'fermanî' tepişîyayî ke seba ke binê çapemenîya azade de xebitîyayêne binê fermanê îqtîdarî de ney. 16 embazê ma 6 mengî yo tepişte yê û hema zî derheqê înan de yew îdîaname nêameyo amadekerdene. Çunke werte de sûcêk çin o. Nê embazê ma seba ke rojnameger ê ameyî hedefkerdene ke no bi xo sûc o û vera azadîya fikran û îfade hêriş o. Ma reyna tîya ra anê ziwan ke no tradîsyono ke ma Musa Anter û Gurbetellî Ersozan ra mîras girewto, do dewam bikero. Hînî çapemenîya azade û rojnamegeran mekerê hedef. Wa embazê ma cade vera bidîyê û mehkemeya înan bêra vindertene. Rojnamegeran rê azadîye.''