Qezaya Kayapinayî ya Amedî de 6 xebatkarî seba ke tewrê protestoyê vera qeyûmî bîyî wezîfeyî ra ameyî girewtene.

Xebatkaranê Şaredarîya Kayapinarî wezîfe ra dûrvistişê Hemşaredare Kezîbane Yilmaz bi çepikan û sloganê ''Ma do bi xoverdayîşî ser bikewê'' protesto kerdbi. Mudirê Qelema Taybete yê Qeyûmî Cîhat Kayhanî venga xebatkaranê bi nameyanê Nazane Îpek, Yuksel Onsal, Omer Ayan, Meleke Demîr û Sonay Altun ê ke na çalakîya protestoyî de cagirewtî dayî. Mudirî dima ke dîmenê çalakîye mojnayî xebatkaran, nê xebatkarî wezîfeyî ra girewtî. Mudira Verêne ya Îmarî ya Şaredarîya Kayapinarî songule Şahîn zî wezîfe ra ameye dûrvistene.

Xebatkare Nazane Îpek vat: "Ez Têkilîyanê Şarî û Çapemenîye de xebitîyayêne. Reya verêne ez wezîfeyê xo yê esasî ra ameya dûrvistene. Qeyûm şaredarîye de ma ser o mobîng kerdêne. A roje mudirî venga ma da û dîmenê çalakîye mojnayî ma. Ma rê va ke 'Şima vera bira dewlete ya qeyûmî protesto kerd.' Mudir Kayhanî mi rê va: 'Ez bi kêfweşîye to karî ra vejena. Şima pêro HDPyîjî çimê mi de sucdar ê." Îpeke îfade kerd ke qeyûm seba ke terefgîrê xo şaredarîye de bido xebitnayene ê kar ra vetî. Îpeke derheqê serebûtî de muracatê mehkeme kerd.