Dêrsim de çalakîya wayîrvejîyayîşê grevê vêşanîye yê ke rayberîya Leyla Guvene de ameyî despêkerdene, yena domanyene. Çalakîya vizêrî ya 19’ine de reyna ame waştene ke wa tecrîd bêro wedartene.
Dêrsim de çalakîya paştdayîşê grevê vêşanîye û rojeyê mergî yê ke semedê wedartişê tecrîdê serê Rayberê Şarê Kurdî Abdullah Ocalanî bi mengan o yenê domnayene, vizêr roja 19’ine de dewam kerde.
Rayberîya Partîya Şaran a Demokratîke (HDP) de reyna Meydanê Seyîd Rizayî yê Dêrsimî de xeylî kesî ameyî têhet. Çalakgeran bi laçiganê sipîyan û pankarta, ’’Vêşanîye nê bêvengîya mirnena,veng bidê cuye’ waşt ke tecrîd cade wedarîyo. Hemserekê HDP’yî yê Dêrsimî Hidir Çîçekî vist vîrî ke rewşa çalakgeran zaf giran a û va ’’Çim û goşê ma rayîrê xeberêka rinde de yê. Ma umîd kenê ke hinî kesêk seba ke waştişê ci yê biheq bêrê ca grevê vêşanîye rê mecbûr memano.’’
