Denîze Poyraz 17ê hezîrana 2021î de hêrişê vera bînaya HDPyî ya Îzmîrî de amebî qetilkerdene. Denîze Poyraz serrgêra qetilkerdişê xo de Îzmîr de bi rayraşîyayîş û panelî ameye yadkerdene.

Panelê ‘’Denîze Poyraz û Têrîbîyayîşê Cînayetanê Sîyasîyan’’ Merkezê Kulturî yê Turkane Saylan de ame kerdene û bale ante sîyasetê teda û bêcezaverdayîşî ser. Keyeyê Denîze Poyraz, temsîlkarê partîyan û rêxistinanê komelê sivîlî û xeylê kesî beşdarê panelî bîyî. Panel de Wekîla DEM Partî Adalete Kaya û avûkate Turkane Aslan qisey kerd.

Avûkate Turkane dîyar kerd ke prosesê tehqîqatî bi tesîrî nêameyo kerdene. Turkane têkilîyê kiştoxan a bi paramîlîteran viste vîrî. Turkane bale ante Vengdayîşê Haştîye û Komelê Demokratîkî yê Rayber Apoyî ser û vat ke ganî her kes wayîrê nê vengdayîşî vejîyo.

Adalete Kaya vist vîrî ke cînayetê sey Denîze Poyraz hetê hêzanê tarîyan ra ameyê kerdene û ganî nê cînayetan de dewlete têrî biba û polîtîkayanê bêcezaverdayîşî ra fek vera bida. 

Dima eşkerayîya çapemenîye ameye dayene. Eşkerayîye de sloganê sey “Jin jiyan azadî” û “Şehîd namirin’ ameyî vatene.

Hemsereka DEM Partî Fulya Erdogan cînayetê vera Denîze Poyraz suîkastêko plankerde û sîyasî bîyo. Fulya vat: ‘’Ma do xeyalanê Denîze Poyraz bîyarê ca.’’

Dima girsetî ver bi Meydanê Gundogduyî rayraşîyayîş kerd û qeranfîlî eştî dengizî.