Îbrahîm Temel (Serdem Pîr)o ke sey 'Reşoyê Nisêbînî', 'Mawa Fuatê Cizîre' şinasîyayêne rixmê ciwanîya xo zî pê çêrîya xo mezgan de ca girewt.

Îbrahîm qezaya Patnosî ya Agirî de dadîya xo ra bi. 15 way û birayê ci estbî. O domano 9. bi. Keyeyê Îbrahîmî neçarîye ra koçê Çanakkale kerd. Îbrahîmî lîse de têkoşîno sîyasî şinasna.

Îbrahîmî 2013 de bire daye ke ver bi koyan şoro. Îbrahîmî serrêka ciwane de Nisêbîn de dest pê têkoşînî kerd û Cizîre de têkoşîn dewam kerd.

Îbrahîm Nisêbîn de 2013-2015 de karanê ciwanan de ca girewt. O çax her kesî o bi nameyê 'Reşoyî' şinasnayêne. Ey qeza de vera narkotîk, fuhuş û ajanîye têkoşîn kerd. Îbrahîmî bi seyan ciwanî destê narkotîkî ra xelisnayî. Dadîyêka nisêbînije seba Îbrahîmî wina vatêne: ''Dadîyan seke lajê înan o tira hes kerdêne. Ma pê samîmîyet û çêrîya ey bawer bîyî. O heta serê sibayî payan ser o bi, tim xebitîyayêne.''

Îbrahîm xoverdayîşê xoîdarekerdişî de derbazê Cizîre bi.Wextê qedexeyê tebervejîyayîşî de o tewrê xoverdayîşê Nûre, Cûdî û Sûrî bi. Şarê Cizîre tira vatêne 'Mawa Fuat.' Ciwananê Cizîre wina qala ey kerde: ''Dadîyan tira zaf hes kerdêne. Eke meseleyêke biqewimîye ey tim çareser kerdêne. Şewêke ey pêro ciwanî dormeyê xo de ronişna. A şewe ey hêvî daye her kesî. Embazî amade bîyî ke seba ey canê xo feda bikerê. O wayîrê tewirêkê çêr û mertî bi. Ey kitaban ra zaf hes kerdêne. Coka tira 'Mawa Fuat' vajîyayêne. Merdimêko fedakar bi. Ey tim vatêne 'Eke ez şehîd biba ganî Cizîre de biba.' Tîya bi keyeyê ey.''

Qedexeyê tebervejîyayîşî de 14ê kanûna 2015î de Îbrahîm tewrê xoverdayîşî bi û derbazê bodrumê bînayêka taxa Cûdîyî bi. Îbrahîm şer de lînga xo ra birîndar bi û bodrum de bi rojan tedawî dî.

O binê nê bodrumî de ke 6-7ê sibate de şehîd bi. 25ê sibate de rojbîyayîşê ci de cenazaya ey bodrumî ra ameye vetene. Cenazaya Îbrahîmî gulana 2016î de hetê keyeyê ci ra Dezgehê Tipê Edlîyî yê Meletî ra ameye girewtene û Patnos de ameye definkerdene.