122 serrî verê cû ewro hûmara verêne ya rojnameyê verênî yê kurdan 'Kurdistan' weşanîyaye û medyaya kurdî dest pêkerd. Rojnameyê 'Kurdistan'î 22ê nîsana 1898î de şaristanê Qahire yê Misirî de hetê Mîqdat Bedirxanî ra qasê 4 rîpelan ame vetene û heta 1902î 31 hûmarê ci weşanîyayî.

Tarîxo ke rojnameyê Kurdistanî weşanîya sey Roja Rojnamegeran ê Kurdan yeno qebulkerdene.

Rojnamegerê Jin-Newsî Bêrîtane Canozer derheqê roje de vat çapemenîya kurdî her tim bîye hedef û ame waştene ke bêra bêvengkerdene la rojnameyanê kurdan tim xo ver da, têkoşîn kerd. Bêrîtane vist vîrî ke nê prosesî de zaf dezgehê çapemenîya kurdan ameyî girewtene, rojnamegerê kurdî ameyî tepiştene, qetilkerdene. La rixmê na zorbazî û teda zî xebatkarê çapemenîya azade nê rêçî teqîb kenê.
Bêrîtane vat: ''Ma israr kerd ke xeberanê xo kurdkî amade bikerê, kurdkî weşan bikerê û rojnameyê kurdkî bivejê. Çunke oyo ke ma ganî keno û tarîxê ma roşnî keno ziwanê ma yo. Ganî hedefo verên ê rojnamegeran ê kurdan kurdkî bibo.''

Edîtorê Ajansê Mezopotamya Bîlal Guldemî zî bale ante rolê rojnameyanê kurdan û çapemenîya kurdan ser û vat: ''Nê prosesî de înan ser o berpirsîyarîyêka girane esta. Rixmê zorî û tedayan zî rojnamegerê kurdî serebûtê Kurdîstanî resnenê rayaumûmîye û nê prosesê vîrusê Korona de zî  xîret kenê ke raştîye biresnê şarî.'' Guldemî bale ante rojnamegeranê tepişteyan ser û waşt ke ê pêrp cade bêrê veradayene.

Rojnameyê Jin Newsî ra Fîlîze Zeyrek zî zor û zehmetîyê rojnamegeran ê kurdan ardî ziwan û vist vîrî ke zaf ajans, rojname û TVyê kurdan ameyî girewtene la vera nê hêriş û tedayan tewirê înan xurtêr bîyî. Fîlîze zî bale ante rojnamegeranê tepişteyan ser û vat ke dewleta tirke rojnamegeran, sîyasetmedaran zîndan de tepişena la tecawuzkeran, kiştoxan û mafya vera dana.