HPG’yî da zanayene ke operasyonî mabênê 1’ê Gulane û 20’ê Hezîrane de ameyî kerdene

HPG’yî eşkerayîya xo de nê zanayîşî dayî:

“19’ê Hezîrane saete 23:50 de teyareyanê şerî û helîkopteran Girê Stûna yo ke keweno sînorê Çelê yê Colemêrgî bombardûman kerd.

20’ê Hezîrane (ewro) nêzdîyê saete 01:00 de helîkopteran Girê Şehîd Karoxî û dewa Bêdehê bombardûman kerdî. Dimayê bombardûmanî artêşa Tirkî ya îşxalkare bi helîkopteranê Skorsky eskerî Girê Stûnayî de ronayî. Têgêrayîşê teyareyan ê bêmerdiman ê serê herême hîna zî dewam kenê.

25’ê Nîsane artêşa Tirkî ya îşxalkare dewê Aşkan, Koxan, Govendê, Arcu û Xozilî yê ke girêdayîyê qezaya Şaxê ya Wanî de dest bi operasyonêkê îşxalkarîye kerd. Artêşa Tirkî ya ke heta 27’ê Nîsane tu netîceyêk operasyonan ra nêgirewto, zext bi dewijanê herême kerd, tayê hemwelatijî ameyî girewtene û zext bi ci ame kerdene.

1’ê Gulane reyna artêşa Tirkî wareyê Aşkanî yo ke girêdayîyê Şaxê yo reyna dest bi operasyonêkê îşxalkarîye kerd. Artêşa Tirkî çarçewaya operasyonê xo yê îşxalkarîye de bax û baxçe, hêga, mal û wasitayî veşnayî û eynî roje bênetîceyêk wareyî ra apey ancîyaye.

19’ê Hezîrane nêzdîyê saetanê 22:30-23:30 de teyareyê şerî yê artêşa Tirkî wareyê Kanîşka yo ke girêdayîyê Herêma Zapî yê Herêmanê Pawitişî yê Medya bombardûman kerd. Nê bombardûmanan de tu zirar nêrest hêzanê ma.”