Serra 2018î de bi bira Meclîsê Şaredarîya Çewlîgî erazîyê zîretî îmarî rê abîyî. Çewlîg asta berze de herêma erdlerzî ya. Tewr peyên vizêr şaristan de bi şîdetê 4î erd lerzabi.

Pisporî hîşyar kenê ke Çewlîg de erdlerzêko pîl do biqewimo. Prof. Dr. Nacî Gorurî hîşyar kerd ke serê xeta fayî ya Kanîreş-Goynuk (Bolu) de reyna erdlerzêk do biqewimo. Tewr peyêne serra 1971î de serê na xeta fayî de bi şîdetê 6.7î erd lerzabi .

Rixmê nê raştîyan zî Çewlîg de dezgehî û şaredarîye goreyê tedbîranê erdlerzî tênêgêrenê. Şaristan de erazîyê zîretî yê sey taxa Înaliyî, rayîrê Çewlîg-Dara Hênî, çarrayîyê meydanê teyarayan, herêma Aftorî îmarî rê abîyî. Nê pêro cayî aslê xo de erazîyê zîretî yê.

Serra 1971 û 2003î de Çewlîg de erdlerzê pîlî qewimîyayî. Erdlerzê 1971î de 878 kesî û erdlerzê 2003î de zî 174 kesî merdî û 520 kesî zî birîndar bîyî. Erdlerzê 2003î ra dima Mehkemeya Cezaya Girane ya Çewlîgî de dewaya umûmîye amebî akerdene. Dewa 6 serran  dewam kerd la pêro vergumanî vera dîyayî.