Çewlîg de binê berzîya bi 2 hezar û 500 rakiman ê Koyê Hesarekî de Merkezê Xijî yê Hesarekî esto ke şar zaf eleqe mojneno ci. Merkezê Xijî merkezê şaristanî ra bi 34 kîlometreyan dûrî yo û tede seba domanan, profesyonelan û amatoran 5 pîstê xijî estê. Merkez de teleskî û teleferîk zî estê. Resayîşê seba merkezê xijî bi mînîbusan û wesayîtê şexsîyî yeno kerdene. Goreyê varayîşê vewre merkez menga teşrîna verêne de abeno û heta menga adare akerde yo.

Heskerdoxê xijî rayîrê merkezî de pê xozayê Çewlîgî mest benê. Bi seyan hemwelatîyê Amed, Xarpêt, Êlih û Meletî zî her serre yenê benê meymanê xozayê Çewlîgî û xo xij kenê.

Alî Yilmaz (50) o ke ame merkezê xijî îfade kerd ke ey tim waştêne ke xo xij bikero la heta nika firsend nêdî. Yilmazî ard ziwan ke heta ke sezonê xijî nêqedo o do xijkerdiş bimuso.

Bêrîtane Ozer zî Çewlîg de wendekar a. Bêrîtane ard ziwan ke seba ke stresî ra bixelisa yena xo xij kena û vat: ''Ez tîya de pê hewayê pakî kêf kena û xo xij kena. Ez pê teleferîkî vejîyena serê Koyê Hesarekî û uca ra ewnîyena dîmenanê bêhempayan.''

Ramazan Peksuyî pare kerd ke Amed de vewre zaf zêde nêvarena û coka ame Hesarek ke xo xij bikero. Rozerîne Yakut zî vat ke a reya verêne ameye merkezê xijî û tira zaf hes kerd.

Hemwelatîyî Mehmet Subaşiyî zî vat: ''Ez seba ke xozayê Çewlîgî bivîna ameya tîya. Êyê ke dibistan û karî ra ecîz bîyî ganî bêrê tîya.''

Pîstan de xijî ra dima tay çalî yenê meydan. Nê çalî her roje hetê personelan ra yenê duzkerdene û dêkerdene.