Rêxistina Partîya Demokratîke ya Şaran (HDP) ya Çewlîgî bi wesîleya serrgêra ronayîşê partîya xo ya 8. şayîyêke oganîze kerde. Wekîlê Riha Omer Ocalan, Wekîlê Çewlîgî Erdal Aydemîr, îdarekarê merkez û qezayan û xeylêk hemwalatîyî tewrê ci bîyî.

Aydemîrî ke şayî de qisey kerd bale ante ser ke partîya înan senî bedelê girdî dayî û heta ewro ameye û vat: ''Seba ke HDPyî semedê haştîye kerdo xo çeng tim raştê zext û hêrişî yeno. Rixmo ke hemserekanê ma pêroyî ra heta wekîl, îdarekar û endamanê ma ameyî tepiştene ma bawerî û qerardarîya xo canêverda, têkoşînî rê dewam kenê.''

Omer Ocalanî zî ard vîrî ke HDP partîya meşru û demokratîk a û vat: ''HDP partîya bingeyên ê sîyasetê demokratîk a ke semedê heqanê merdiman û çareserkerdişê meselaya kurdî xîret kena. No gure bi masa û dîyalogî beno. Serranê  2013 û 2015î de birêz Ocalanî reyde Îmrali de masaya çareserî na ro. Dewlete zî zaf hol zana ke çareserî pê kamî beno. Ganî helêke verê cu birêz Ocalano ke muhatapo verên ê na mesele yo reyde temas bêro kerdene ke mesele bêro çareserkerdene.''