Çewlîg de seba ke meşte weçînitişo cayî yo şar paweno ke vurayîşêk virazîyo. Çewlîgo ke şaredarîya ci 15 serrî yo destê AKP’yî de ya hewna banê ci yê xizmetî çino. Îhaleyê Banê Xizmetî yê Şaredarîye bi 40 mîlyon 751 hezarî TL dîya şîrketêk.  La seba ke teslîmatê cayê awankerdişî hewna bica nêameyo dest bi projeyê înşaatî nêameyo kerdene.

Çewlîgo ke 7 partîyan seba weçînitişê cayîyî namzedê xo ronayê ma şarê ci ra derheqê weçînitişî de fikrê înan persayî.

‘Wa Bibo Dersêk’

Hemweletaijan ra Selahattîn Aratî vat ke o wazeno no weçînitiş bibo dersêk û vat, “Tena Çewlîg de nê wa heme cayanê Tirkîya de bibo dersêk ke milet tena weçînitiş ra weçînitiş nêro vîrardene. Ma wazenê ke HDP qezenc bikero. Wa înan rê bibo dersêk. Wa miletî rê xizmet bikerê. Her kes bêkar o, sûkan de veng gêreno. Ez citkar a, bi zorî debara xo kena. Ez pêserîyê xo ra wena. No do heta key wina şiro? Ez citkar a nêeşkena ber bidî û wextê rotişî de zî çîyêk qezenc nêkena. Seba ke ez Tirkîya de ciwîyena ez zaf xemgîn a.”

‘Eke Vurayîş Bibo Do Xizmet Zî Bibo’

Hemwelatijan ra Alî Berîkî zî vat, do HDP qezenc bikero û vat, “Ma wazenê ke vurayîşêk virazîyo. Çunke heta ewro ma xizmetêk nêdî. Eke vurayîş bibo do xizmet zî bibo. Naye ra ez bawer kena ke do HDP qezenc bikero. AKP îdare keno, êyê bînî erzenê turikê xo. Butçe rê 5 bêro 4’ê ci xo rê wenê. Her kes nasê xo gêno kar. Her kes vernî de ca dano nasê xo. Eke vurayîş bibo ez bawer kena ke do her çî sererast bo.”

‘Samîmîyetê Înan Çino’

Ersan Kiliçî zî vat namzedê hemşaredarîye yê HDP’yî Hîşyar Ozsoy merdimêko hewl û durust o û nê vatî:  “O birayêk o ke ma ci ra hes kenê, nizdê şarî yo. Partîyê bînî şinê kesanê ke eleqeyê înan Çewlîgî dir çino anê namzed ramojnenê. 15 serrî yo ke AKP îdare keno. Banê şaredarîye hewna çino, keso ke hewna banê ci çino do senî yewna kesî rê keye virazo. Şima zî halê rayîran vînenê. Samîmîyetê înan çino. 15 serrî yo ke bê xapênayîşê şarî sewbîna çîyêk nêkenê.”

Hemwelatij Fuat Kiliçî zî vat ê xizmetanê şaredarîye ra memnûn nêyê û vat, “Labelê îhtîmal esto ke AKP weçînitişî qezenc bikero, ma do roja Yewşemeyî bivînê. Ez do zî reya xo bidî HDP’yî.”

‘Mîyanê Enkazî De Verda’

Hemwelatijan ra Mehmet Zekî Çukukî vat o bawer keno ke do weçînitişê Çewlîgî de MHP bi ser bikewo. Çukukî vat serekê şaredarî ya AKP’yî xizmet nêkeno û vat, “3 serrî esto ke keyeyê mi halê enkazî de yo. Ma xapêneno, kepçeyêk dano piro şino. Înan mehlaya Kulturî de vurayîşo şaristankî kerd. Ma kewtî kuçeyan. Ma se kerê. Nê ra xirabêr çîyêk esto? Ez senî reya xo bidî AKP’yî. Înan ez keyeyê mi ra veta, asinê keyeyê mi rot, mîyanê enkazî de verda û şî. Biewnî no ciwan torpîlê ci çino. Muracatê Îş-Kurî keno ê rê qe kar nêvejêno. Ez do nê emrî ra dima se kerî. Keyeyê mi şi, her çîyê mi şi.”

Ekremo ke waşt peynameyê ci dizdî bimano zî sey Çukukî qisey kerd. Ekremî îdareyê şaredarîye yê mewcûdî bi dizdîye sûcdar kerdî û vat, “Ganî ma nê parlamenteran û wezîran ra hendî vajê bes. Ez vana do MHP şaredarî qezenc bikero, Çewlîg de AKP’yî rê rey çina.”

‘Kamî Qezenc Kerd Xizmet Nêkerd’

Hemwelatijan ra Faysal Karaobayî vat ê hewna nêzanê do kam qezenc bikero û nê vatî: “15 serrî yo kamî qezenc kerd xizmetêk nêkerd.  Ez mehlaya Sîmanî de ronişena hewna îmarê ci çino. Problemê ma yê kanalîzasyon û binawanî estê. Weçînitiş ra weçînitiş partîyî yenê zîyaretê ma. Vanê eke ma qezenc bikerê ma do heme probleman hal bikerê la çîyêk zî hal nêkenê. Ez şaredarîye ra memnûn nêya. Ez do reya xo bidî HDP’yî. Verî mi dayêne AKP’yî la ez do nê weçînitişî de nêdî. Wa wareyê ma de vurayîşêk bibo.”

‘AKP Nêeşkeno Reyan Bigêro’

Ahmet Dîrenî zî vat ke şaristan de seba MHP’yî meylêk esto, seba ke AKP’yî xizmetêk nêkerdo do nêeşko reyan bigêro û vat, “Cevdet Yilmazî (Wezîrê Averşîyayîşî yê AKP’yî yo verên) seba Çewlîgî se kerd? Serê Çewlîgî de hewrê sîyayî ameyê. 10 serrî yo ke Bendê Gulbaharî de awe danê pêser, awe danê deşte?  Eke kesêk hewna nêzano awe bido do xizmetêkê bînî senî bikero? Ez awankerdoxanê ewilênan ê AKP’yî yê Çewlîgî ra ya. Milet rey bido kamî do o qezenc bikero. Mi hewna qerar nêdayo ke ez do rey bidî kamî.”

Eyup Kelatî zî vat ke o bawer keno ke do AKP weçînitiş de bi ser bikewo. Kelatî ê hemwelatijê ke vatîbî xizmet nêno kerdene sûcdar kerdî û vat AKP xizmet keno.