Endama Konseya Rayberdişî ya KJKyî Çîgdeme Dogu: Caardişê estbîyayîşê cinîyan merkezê prosesê komelkîyî de, awankerdişê haştîye de hemleyêka krîtîk a. Na meseleya estbîyayîşî ya coka ganî cinîyî wayîrê prosesî vejîyê.
Endama Konseya Rayberdişî ya KJKyî Çîgdeme Dogu Medya Haber TV de rojdem ercna.
Qiseykerdişê Çîgdeme ra tayê noqtayê girîngî wina yê:
‘’Rayber Apoyî de tayê pêvînayîşî ameyî kerdene. Rayber Apoyî seba çareserîya meseleya kurdan îradeyêko xurt no werte. Dewlete verî ra nata vera xoverdayîş û serewedaritişê kurdan polîtîkayêka sîstematîke ya înkar û îmha arde ca. Heman polîtîkayî hema zî dewam kenê.
Ewro teberê sînorê Tirkîya de zî pêkewtişî qewimîyenê. Rojawan de nê rojan de tewr tay 20 kesan dinyaya xo bedilnaya. Dewleta tirke bi bahaneya ‘terorî’ hêriş kena la dewleta tirke bi xo terorîzmî kena. Pêro doman, sivîl, hunermend û cinîyê kurdî hedefê ci de yê. Başûrê Kurdîstanî de zî hêrişê dewleta tirke est ê.
Dewlete hetêkî ra hêriş kena hetê bînî ra atmosferê cigêrayîşê çareserîye awan kena. Dewlete qiseyê ‘Wa PKK çekan war verdo’ ra ber çîyêkî nêvana. Seba ney ganî hêverî dewlete şîdet û terorî ra fek vera bida.
Nê prosesî de rolê pîlî kewenê milê cinîyan ser. Caardişê estbîyayîşê cinîyan merkezê prosesê komelkîyî de, awankerdişê haştîye de hemleyêka krîtîk a. Na meseleya estbîyayîşî ya coka ganî cinîyî wayîrê prosesî vejîyê. Azadîya cinîyan yena manaya azadîya komelî. Ganî cinîyî nê têkoşînî pîlêr bikerê û serkêşîya prosesî bikerê.
Kerdişê HTŞyî nênê qebulkerdene. Şorişê Rojawanî seba pêro şaran, Rojhelatê Mîyanênî û dinya ganî mîsal bibo. Îdareyo ke HTŞyî nayo ro do dişmenîya cinîyan bikero. Ganî newe ra awankerdişê Sûrîye de cinîyî wayîrê hêz û qiseyan bibê.
Îdareyo Xoser seba pêro cinîyan seba azadî û têdûştîye nimûneyêka raşt a. Sere de cinîyê Rojhelatê Mîyanênî ganî pêro cinîyî wayîrê nê sîstemî vejîyê. Îdareyê Xoserî de cinîyî wayîrê artêş, dezgeh, rêxistin û kargehanê xo yê.
Ma hê kewenê serrgêra Komployê 15ê Sibate. Ez xoverdayîşê Rayber Apoyî yê 26 serrî selam kena. Ganî Rayber Apo nê prosesî de hinî azad bibo. Ez venga şarê ma, dostan, pêro cinîyan û têgêrayîşanê ma dana ke na serre bikerê serra fînalê komplo û tecrîdî û azadîya Rayber Apoyî bîyarê ca.
Şarê Rojawanî û şerwanî Tişrîn de bi xurtî xo ver danê. Tişrîn de tarîx newe ra nusîyeno. Cinîyî bi qehremanî wayîrê awbendê Tişrînî û şerwananê xo vejîyenê. Yanî Tişrîn de cinîyî wayîrê azadîya xo vejîyenê. Ez nê xoverdayîşî selam kena û serkewtiş wazena.’’
