Endama Konseya Rayberdişî ya KJKyî Çîgdeme Dogu beşê diyînî yê roportajê xo de derheqê seycitîya têkoşînê vera sîstemê Îmraliyî û têkoşînê cinîyan de qisey kerd.

Qiseykerdişê Çîgdeme Dogu ra noqtayê girîngî wina yê:

''Rayber Apoyî tim şîdetê vera cinîyan seke berhemê sîstemê îqtîdaran, dewleta netewe-sîstemê serdestîya camêrdan o ercna. Yanî hetêkî ra no sîstem ame bihêzkerdene û cinîyî ameyî bêhêzkerdene. Rayber Apoyî vera nê sîstemî şer kerd. Rayber Apoyî Kurdîstan de kerd ke meseleya cinîyan cinîyan reyde çareser bikero, rêxistinîya cinîyan û xopawitişê cinîyan aver bero. Rayber Apoyî bi fikrê 'camêdîye ra fekveradayîş'î çareserîya mesele mojnaye.

Îşte Rayber Apoyî seba ke meseleya kurdan û cinîyan ser o çareserîyê radîkalî pêşkêş kerdî vera ey Komployo Mîyanneteweyî ame caardene û o nika yeno tecrîdkerdene. Coka şexsê Rayber Apoyî de têkoşînê cinîyan yeno tecrîdkerdene. Hetê bînî ra xoverdayîşê Îmraliyî yê Rayber Apoyî teyna seba xo ney seba pêro cinîyan û şaran o. 

Îqtîdarê AKP-MHP-Huda Par-Yeniden Refahî yo ke dişmenê cinîyan o Vakurê Kurdîstanî de hêrişê destkewteyanê cinîyan keno. Ancî no îqtîdar bi polîtîkayanê şerê taybetî îradeyê cinîyan keno hedef. Teyna vera cinîyan ê kurdan ney no îqtîdar vera cinîyan ê tirkîyayîjan zî hêrişan keno û destkewteyan keno hedef. Îqtîdar û dewleta tirke  bi rayîrê MÎTî Rojawan, Başûr, Şingal û Mexmûr de kenê ke asta têkoşînê cinîyan apey berê û nê têkoşînî tasfîye bikerê. Biewnê Rojawan, Başûr, Ewropa de şerwan û fermandarê cinîyî yê serkêşî yenê qetilkerdene. 

Dewleta tirke seba ke hêz û îradeyê cinîyan bişikna nînan kena û coka hêzê hegemonî zî paştî danê ci. Nê hetî ra hêrişê vera Rayber Apoyî û hêrişê vera cinîyan yewbînan rê paralel ê. Senî ke Rayber Apo bi hawayêkê xurtî xo ver dano ganî cinîyî zî xo ver bidê. 10ê teşrîna verêne de Hemleya 'Rayber Apoyî rê Azadîye, Meseleya Kurdan rê Çareserîye' dîyabî destpêkerdene. Ganî pêro têgêrayîş û rêxistinê cinîyan tewrê na hemle bibê. 

Ma têkoşînê vera şîdetê serê cinîyan teyna bi yew roje (25ê teşrîna peyêne) sînordar nêkenê. Têgêrayîşê ma seba pêro serre bernameyê xo yê çalakî û aktîvîteyan dîyar keno. Sloganê Hemleya KJKyî 'Bi Jin, Jiyan, Azadî; Ver bi Şorişê Cinîyan' zî şîarê ma yê têkoşînê vera şîdetî yo. Çunke heta ke şîdetê vera cinîyan bi şorişê cinîyan çareser beno.

Ma şîdetê vera cinîyan bi hawayêkê pêroyî bingeyê koçkerdiş, xizanîye, bêkarîye, kede, qirkerdişan, tecawuz, fuhuş, tîryakî ûsn de ercnenê. Girîng o ke ma bivînê ke sebebê nê meseleyan eqlê camêrdan o cînsîyetperest, nîjadperest û dînperest o. Ganî 25ê Teşrîna Peyêne de teyna cinîyî mexdûrîyetanê xo ser o qisey nêkerê; eqlê camêrdan bi hawayêkê radîkalî muhakeme bikerê.

Ganî rojê sey 25ê Teşrîna Peyêne bibê rojê averberdişê ferasetê xopawitişî. Ma bi nê hawayî 25ê Teşrîna Peyêne bi perspektîfê şorişê cinîyan bi hawayêkê pêroyîyî ercnenê. Perpektîfê neteweya demokratîke, xoserîya demokratîke û şorişê cinîyan asta stratejîke de girîng o. Ma ganî bi nê hawayî pêro çalakî û aktîvîteyanê xo bikerê.

Ma venga pêro cinî û dadîyanê kurdan, rêxistinanê cinîyan ê kurdan danê ke bi ruhê hemleya KJKyî tewrê aktîvîte û çalakîyanê 25ê Teşrîna Peyêne bibê. Ma venga pêro cinîyan û rêxistinanê cinîyan ê dinya û Rojhelatê Mîyanênî danê ke bi xurtêrî na roje pêşwazî bikerê, bi rêxistinî û ferasetê xo kokê şîdetî bîyarê.''