Çirtanê Miradîye yê serê Çemê Bendî Mahî yê qezaya Miradîye ya Wanî, bi helîyayîşê vewre reyde awa ci zêde bîye. Çirtanê Miradîye yo ke nêzdîyê 20 metroyan berz ra ver bi cêrî herikîyena, her mewsim bi hawayêkê cîyayî weş asena. Timî merdimî şinê serdana Çirtanî û uca arasîyenê û  pîknîk kenê.

Çirtanê Miradîye yo ke eseranê serê erdî ra yew a û Çemê Bendî Mahî yo ke sereke cayê berardişê masîyanê încî kefalî yo, bi HES’î yeno cehdkerdene ke bêrê çinkerdene. HES o ke hama corê çirtane de ameyo viraştene, hamnanan awa aye qut keno. Bi qutkerdişê awe ya serê çirtane ya seba HES’î, çirtane û Çemê Bendî Mahî ziwa beno. Na rewşe bena sebebê çinbîyayîşê masîyanê încî kefalî yê ke teyna Gola Wanî de ciwîyenê û bi hezaran gandaran ê ke gole de ciwîyenê.

Bi Hezaran Kesî Şinê Serdana Çirtanî

Hamnanî reyde, dimayo ke germ rind beno zêde, Wan û qezayanê der û dorê ci ra bi hezaran merdimî yenê Çirtanê Miradîye. Dîmenê weş ê çirtane ya ke 20 mertoyî co ra herîkîyena bi cêr, bala kesê ke seba pîknîk û arasîyayîşî ameyê uca ancena xo ser. Vakurê Kurdistan, Tirkîya û welatanê bînan ra zî turîstî yenê serdana çirtane.

Ma Nê Cayanê Rindekan Bipawê

Halîl Aslano ke Stenbol ra ameyo çirtanî bivîno, vat çirtane û der û dorê ci zaf tesîr bi ci kerdo, ganî nê cayî bêrê pawitene û vat, “Ganî her kes nê cayanê rindekan bivîno. Vengê awe û dîmenê çirtane yê rindekî bîhna merdimî kenê hîra û xo ra heyran verdanê. Cayê winayênî her ke şino çin benê. Tîyayî ser o HES ameyo viraştene. Heme dinya de cayê winayênî yenê pawitene, la welatê ma de yenê çin kerdene. Her ca de HES û awbendî yenê viraştene. Çirtana ma bena qurbana pere û rantî. Ez vengdayîş her kesî rê kena ke nê cayanê rindekan bipawê.”