Çopê dewa Xorozî ya qezaya Xîzanî ya Bedlîsî Newala Hespistî de verdîyenê. Newala ke 30 dewan rê derbaz bena  pê çopan hetê şaredarîye ra yena lêşinkerdene.  Çopî hem weşîya merdiman rê hem zî xoza rê gefî wanenê.

Roniştoxanê dewa Xorozî ra Îkbale Koçman çopî benê sebebê mergê heywanan û mîyanê çopan de madeyê vêşnayîşî zî est ê. Koçmane vat: ''Ma çend reyî waştişnameyî dayî la çîyêk nêno kerdene. Reyna çopî erzîyenê tîya.'' 

Roniştoxêka bîne Mahşûke Karlidag çopî awa înan herimnenê û vat: ''Tîya warê daran o, daristan o. Eke şewat bivejo nê darî zî do bivêşê. Ma têna wazenê çopî wa tîya ra bêrê wedaritene. Seba ke ma kurd ê no çi ma rê yeno kerdene. Rojawanê Tirkîya de çîyo winasên çin o. ''

Mixtarê dewa Tîyî Muzaffer Aslanî heta nika xeylêk reyî muracatê selahîyetdaran kerdo la înan çîyêk nêkerdo. Aslanî vat: ''Nê çopî weşîya ma rê gefî wanenê. Ma tim nêweş kenê. Verî newale de bi hezaran maseyî est bîyî la nika çopan ra maseyêk zî nêmend. Tim boya pîse yena. Ma tim pancerayanê xo qefilnenê. Çend reyî ma gerre kerd la mesele hema zî dewam kena.''