Polîsan serê sibayî pê barîyeran û wesayîtanê zirxînan dormeyê Şaredarîya Êlihî girewt. Sereştişanê hemwextan ê keyeyî de Hemşaredarê Êlihî Songule Korkmaz û Mehmet Demîr û endamanê meclîdê şaredarîye reyde 12 kesî ameyî destbendkerdene. Şaredarîye rê qeyûm ame tayînkerdene la heta nika bi hawayêkê fermîyî eşkerayîyêke nêameye dayene.

Polîsanê ke dormeyê bînaya şaredarîye girewt, destûr nêda ke karmendî bikewê bîna. Endamê meclîsî û Hetkarê Hemserekanê Şaredarîye Nevzat Memcîk ameyî verê şaredarîye û înan eşkera kerd ke xeylêk xizmetê dezenfekteyî werte ra ameyî wedaritene û waşt ke bikewê bînaya şaredarîye.

Memcîkî vera polîsan tewirê xo mijna û vat: ''Nê rojanê Korona de weşîya şarî binê tehlukeyî de ya.'' Tay hemwelatîyan zî bi vatişanê ''No îşxal o, şerm o.'' nêrazîbîyayîşê xo mojnayî.

Wekîla HDPyî Êlihî Ayşe Acar Başaran û endamê partîye ameyî verê bînaya şaredarîye û vera dormegirewtişî tewirê xo mojna. Başarane vat: ''Ma weşîya şarî fikirîyenê, AKP weşîya şarî rê gef waneno, dişmenîya kurdan keno. Hesabê ney do rojêk bêro persayene.''

Polîsanê ke destê înan de lapikî estbî û rîyê înan de maskeyî estbî hêrişê hemwelatîyan kerd û hemwelatîyî derb kerdî. Hêrişê polîsan de Hemserekê HDPyî yê Êlihî Omer Kulplu û Fatma Ablay zî tede 16 kesî ameyî destbendkerdene.