Vizêr (2ê teşrîna verêne) bi namzetanê PDKyî yê weçînayîşê Iraqî hêzanê çekdaran ê PDKyî xîret kerd ke debikewê Şingalî la tewirê şarî ra dima ê neçare mendî ke apey abigêrê.

Îdareyê Xoserî yê Şingalî bi kombîyayîşê çapemenîye vera xîretê PDKyî nêrazîbîyayîşê xo mojna. Selahîyetdarê Îdareyê Xoserî û endamê Yewîya Rayberanê Eşîranê Şingalî zî tewrê kombîyayîşî bîyî.

Hemserekê Meclîsê Xoserîya Demokratîke yê Şingalî Merwan Bedelî bale ante ser ke dima ke hukmatê Iraqî û Hewlêrî Şingalî ser o peymana 9ê teşrîna verêne ya 2020î îmza kerde PDK wazeno Şingal de ca bido xo. Bedelî pare kerd ke xîretê PDKyî heta nika ameyî pûçkerdene la narey PDK bi bahaneya weçînayîşê Iraqî wazeno debikewo Şingalî.

Bedelî vat: ''Rojdemê Şingalî de xebatê weçînayîş û propaganda estê. Heta nika qet yew keso ke Şingal de kampanyaya weçînayîşî kerdêne nêame astengkerdene. Qefilnayîşê rayîrê heyetê PDKyî cara 20 rojî yo rojdem de bi. Ameyêne waştene ke endamê Ofîsê 17. yê PDKyî wa abigêrê Şingalî. Mesuldarê nê ofîsî Aştî Koçer o. Xîretê agêrayîşê nê ofîsî parçeyê peymana vera Şingalî bîyî.

Ma verî zî heyetê PDKyî hişyar kerd ke wa nêro Şingalî. La heyetî goş nêda ney û bi bahaneya weçînayîşî waşt bêro.PDK wazeno cayanê ma yê fîrazan ê sey Turbeya Şerfedînî sey baregehî bişuxilno. Ma qetî ney qebul nêkenê.

Ma hukmatê Iraqî rê zî vat ke ma nêwazenê PDK bêro tîya. Ma her kesî ra zêdêr demokrat ê la eke ê rayîr nêdanê ke partîyê ma yê êzidîyî xebata weçînayîşî bikerê ma zî destûr nêdanê înan. La xora PDK semedê weçînayîşî nêno, PDK wazeno tîya de baregehêk abikero. PDK amadekarîye keno ke hêzêkê pîlî yê pêşmergeyan bîyaro Şingal.''