Qezaya Silopî ya Şirnexî de 3'ê Gulane 2017 de panzerêkê polîsan kewt mîyanê keyeyêk û Mûhammed û Fûrkan Yildirim ê ke 7 û 6 serrî yê, qetil kerdîbî. Derheqê şoforê panzerê zirxinî polîs Omer Yegît û amîrê ey Mûrat Madenî de dewa ameye akerdene. Roniştişê 9’ine yê dewa Mehkemeya Cezaya Giran a 2‘ine ya Cizre de ame dîyayene.

‘Mudirê Asayîşî Berpirsîyar o’

Pîyê her di domanan Mesût Yildirim, Parlamentera HDP'yî ya Şirnexî Nûran Îmîre, endamê Merkezê Vîrî û Hemsereka HDP'yî ya Qeza Guler Tûnçe tewrê roniştişî bîyî. Meqamê îdîayî waşt Omer Yegît û Mûrat Madenî rîyê sûcê kiştişê bitexsîrî ra bêrê cezakerdene. Verguman Yegîtî ard ziwan, berpirsîyarê sereke yê serebutî Mudirê Asayîşî yê ê demî Selçûk Erdogan o. Labelê no îfadeyê Yegîtî zabitnameyê roniştişî de nêame nuştene. Roniştiş seba 19'ê Hezîrane ame taloqkerdene.