Leşkeran dewa Awyanî ya bajarekê Bajêrganî ya qezaya Geverî ya Colemêrgî de 29ê teşrîna verêne de camêrdê bi nameyê Şeralî Derelî (61) 50 metre nêzdî ra kişt. Dîmenê serebûtî dima eşkera bîyî. Dîmenan de cenazaya Şeralî Derelî erd de yo û leşkerê kamuflekerdeyî serê ci de ameyî pêser. Dîmenan de dîyeno ke leşkerî serê cenazaya ci de nobete gênê.

Kesêk dîmanan de qisey keno û wina fam beno ke birazîyê Derelîyî yo vano: ''Keso ke nika erdî ser o ame dergkerdene apê min o. Apê mi rê 20-30 metre cêrî ra guleyî ameyî eştene. Siba ê do vajê destê ey de teqaberê C-4î estbi. La apê mi ni camêrdo 60 serre bi, yew sûcê ci çinbi.''

Wexto ke hemwelatîyî şîyî ke cenaza bigêrê leşkeran gule û bombayê gazî varnayî înan ser. Hem kes dîmenan de vano: ''Dewleta ke tira vajîyeno Tirkîya na ya.'' û apê xo reyna serê erdî de mojneno. Vîdeo de xeylêk leşkerê çekdarî asenê û vengê hewarê merdimanê Derelîyî eşnawîyenê.