Konseya Neteweyî ya Betnahrînî bi eşkerayîyêka nuştekîye qirkerdişê vera Sûryan-Asûr-Aramî û Keldanîyan û şarê bîn ê Xiristîyan ê mabênê 1915-1924’î ardî vîrî û vat, “Ma serrgêra 104’ine ya qirkerdişî bi heme dejanê xo, her serre 15’ê Hezîrane de yad kenê. Labelê Komara Tirkîya û hukmatê ci qirkerdişê vera şaran înkar kenê, cehd kenê ke Muslimanan zî bi zuranê xo bidê bawerkerdene.”

Dewamê ci de ame vatene, “Seba naye zî mabênê gurbanê etnîk, dînî û nasnameyê cîyayê ke Tirkîya de ciwîyenê, hîsê têhetciwîyayîşî ameyo çinkerdene, sîyasetê durîkewtişî, cîyabîyayîşî ameyo xorînkerdene. Mezopotamya û Anatolîya de nameyê şaranê kehenan, dînanê înan, sembolanê înan ê tarîxkî û kulturkî ameyê bedilnayene û nê sey milqî, heqeret, cervînayîş yenê dîyayene. Yeno vatene, senî şarê Sûryan ê Xiristîyanî û şarê bînî ameyê verê çinkerdişî, rêçê eseranê înan ê tarîxkî bi kamcîn metodan cehd kerdo ke pak bikerê. Ê ke nê rastîyan qisey  kenê bi şîdet yenê cezakerdene û sîstemo antî-demokratîkî yo ke heqîqet qedexe yo ameyo awankerdene.”

Kesê ke Tirk nîyê bi dişmenîye yenê dîyayene

Eşkerayîye de ame vatene, awanîya neteweyî ya ke ameya awankerdene seba ke bi îdeolojîyêkê nîjadperestî û înkarkerdişî yena weyekerdene, seba ke mezgê merdiman bi perwerdeyê teberî yê zanistî û tarîxê fermî ameyo şutene, yeno bawerkerdene ke Tirkîya de teberê Tirkan de şarî û bawerîyê bînî çin ê. Wina ame vaten, ”Hişmendîya ke şaranê Mezopotamyaya core û Anatolîya Tirk vînena, bedilîya nêweşîyêka nîjadperestîye, kesê ke Tirk nîyê bi dişmenîye yenê dîyayene.

Ganî Qirkerdişê 1915’î bêro qebûlkerdene

Eşkerayîya Konseya Neteweyî ya Betnahrînî de ame vatene, “Heta ke birînê şaran akerdê bimanê û bêrê înkarkerdene, dişmenîye, nêbawerîye, kîn û nefret nêqedîyeno.  Çîyo rast o yo ke rastîyê ke ameyê ciwîyayene bêrê qebûlkerdene û Qirkerdişê 1915’î bêro qebûlkerdene, ê ke nê qirkerdişî de para înan esta uzrê xo biwazê. Ma şarê ma yo ke Qirkerdişê 1915 de cuya xo vîndî kerda û heme şehîdanê şaranê bînan bi hurmet yad kenê, ma vengdayîş şarê Tirkîya rê kenê ke vera sîyasetê înkarkerdişî sere wedarê û Seyfo’yî qebûl bikerê. Hetê bînî ra ma vengdayîş rayapêroyî ya dinya û dewletanê hemdeman rê kenê  ke vera AKP’yî yo ke hukmatê Komara Tirkîya yo û Qirkerdişê 1915’î qebûl nêkeno, na babete de zext bikerê.”