Îtîfaqê Kede û Azadîye ke HDP, EMEP, TÎP, EHD, TOP û SMFyî ra yeno pê, destekê şarê Serhedî gêno. Îtîfaq Kurdîstan de kelecanêkê pîlî visneno mîyanê şarî. Şarê Serhedî dîyar kerd ke ê mehkumê Îtîfaqê Cumhur û Îtîfaqê Miletî nîyê û îfade kenê ke ameyox û hêvîya şaran Îtîfaqê Kede û Azadîye yo.

Îdrîs Yaşarî bale ante ser ke hêrişê wextê peyênî de vera şarê kurdî zêdîyayê û vat: ''Heta nika vera kurdan hêrişî ra ber çîyêk nêame kerdene. Îtîfaqê Kede û Azadîye bîyo hêvîya ma. Ma do seba nê îtîfaqî hîna zaf bixebitê û kede bidê. No hêz ma de yo. Kurd hînî kurdê verênî nîyê. Na babete de ma sereberz ê. Yewbîyayîşê kurdan ma zaf kêfweş keno. Îtîfaqê miletî û îtîfaqê cumhurî kurdan rê zulm kenê. Şar nînan ra aciz o.''

Huseyîn Guzelturkî zî ard ziwan ke wa her kes destê xo bero serê wijdanê xo û wina têbigêro. Guzelturkî vat: ''Ganî naye ra pey mîyanê kurdan de cîyatîye nêba. Ganî ma rayanê xo bidê xo. Partîya ma HDP mojnena ke kurdî çendêk xurt ê. Ma mehkumê Îtîfaqê Cumhur û Miletî nîyê. Ma do bi Îtîfaqê Kede û Azadîye hêzê şarê kurdî bimojnê înan.''

Turgut Karayî dîyar kerd ke partîya înan eşkera ya û vat: ''Ma hêzêko pîl e. Ma wazenê bi rehetî ziwanê xo bimusê, bi ziwanê xo perwerde bivînê. Ganî şarê kurdî bi yewî û paştdayîşî têbigêro. Ganî şarê kurdî ray nêdo îtîfaqanê bînan. Îtîfaqê ma Îtîfaqê Kede û Azadîye yo. Ganî ma raya xo bidê partîya xo. Teda nêeşkena ma partîya ma ra dûrî bivisna. Ma nînan ra tersenê. Partîya ma eşkera ya. Ma do tim destek bidê ci.''