Partî û rêxistinanê Komxebeta Îtîfaqê Kurdîstanî derheqê hêrişanê vera Başûrê Kurdîstanî de eşkerayîyêka nuştekîye daye. Eşkerayîye wina ya:

''Şarê kurdî bi se serran cografyaya xo de maruzê qirkerdiş, koçberîyan mend û bedelê giranî dayî. Rixmê nînan zî şarê kurdî têkoşînê xo yê destvistişê heqan ra fek vera nêdo. Seba Herêma Kurdîstanî têkoşînê xoserîye, seba Rojawanî de têkoşînê statuyê fermîyî dewam keno.

Nê prosesî de tay welatê îşxalkerî xîret kenê ke mabênê partîyan ê kurdan de alozîye vejê û goreyê menfaatanê xo nê partîyan bişuxilnê. Seba kurdan nika rewşa destvistişê firsendan esta. Eke nê alozîyî dewam bikerê kurdî do hem nê firsendan hem zî destkewteyanê xo vînî bikerê.

Sere de partîyê kurdî ganî pêro kurdî vera mudaxeleyanê provakatîfan baldar bibê û seba pawitişê menfaatan ê neteweyîyan têkişt vinderê. Ma venga înan danê ke meverdê ke mabênê kurdan de şerêk dest pêbikero. Çunke vizêr nê şerî de çew ser nêkewt û ewro zî çew do ser nêkewo. Verî birakujîya kurdan bibî sebebê zaf netîceyanê xiraban.

Sere de Îdareyê Herêma Kurdîstanî ganî pêro partîyê kurdan mecbûr ê ke hêverî destkewteyanê kurdan bipawê û aver berê. Roje roja yewîya neteweyî ya. Roja pawitiş û averberdişê destkewteyan a. Rayîrê çareserîya nakokîyanê kurdan dîyalog o. Coka ma vengda terefan danê ke dîyalogan sey rayîrê çareserîye bivînê û meseleyan çareser bikerê.''