Mazlum Dagî rê bi îdîaya 17ê temmuza 2019î de  kiştişê berpirsîyarê MÎTî Osman Kose, hemwelatîyanê Iraqî Nerîmane Osman û Beşdar Ramazanî cezaya dardekerdişî ameye dayene. Ame zanayene ke îtîrazê seba bira ceza yeno astengkerdene. Dadîya Dagî Kudrete û babîyê Dagî Zekî Dag derheqê babete de bînaya Partîya Herêman ê Demokratîkan a Amedî de kombîyayîşê çapemenîye kerd.

Dadîye Kudrete Dag îfade kerd ke seba ke wekaletê ci bigêro avûkatê Mazlum Dagî ganî Dagî reyde pêvînayîş bikero la seba pêvînayîşî nêno destûrdayene. Dadîye Dage ard ziwan ke seba îtîrazê bire wexto qanûnî qedîyeno û eke lajê ci wekalet nêdo avûkatê xo nêeşkenê îtîraz bikerê.

Dadîye Dage vat: ''Avûkatî hîrê rey ê ke şino zîndanî yeno. Avûkatî rê vanê zîndan de kesêko winasên çin o. Ma zanenê lajê mi uca de yo. Semedo ke sînorî girewte yê, 3 mengan ra nata ma lajê xo nêdî. No şerm o ke cezaya winasêne daye ciwanêkê kurdî. Ê kurd ê, nameyê welatê înan Kurdîstan o. Şerm o ke birayê xo yê kurdî rê na ceza daye, ez înan şermezar kena.''

Dadîye Dage Wina dewam kerd: ''Ganî na ceza bêra batalkerdene. Ez venga pêro parçeyanê Kurdîstanî û şarê kurdî dana wa vera naye vengê xo vejê.''

Babî Zekî Dagî zî wina qisey kerd: ''Ez na bira mehkeme şermezar kena. Ganî goreyê heqanê merdiman cezayêke bêra dayene. Ma wazenê ke na ceza batal biba. Zaf şerm o ke kurdî ciwanêkê kurdî darde bikerê.''

Goreyê qanûnanê Herêma Federale ya Kurdîstanî cezaya dardekerdişî ganî reya verêne hetê mehkeme ra bêra tesdîqkerdene. Dima zî bire do pêşkêşê tesdîqê Serekê Herême Neçîrvan Barzanî bêra kerdene. Eke Barzanî tesdîq bikero ceza do bêra caardene.