HDP’yî seba 2 hezar û 500 rayê ke zafaneyê înan ê HDP’yî bî la ameybî betalkerdene newe ra bêrê hûmaritene îtîraz kerd, labelê Heyetê Weçînitişî yê Bajarî yê Mûşî îtîraz red kerd.  Goreyê netîceyanê ke qetî nêyê tîfaqê AKP/MHP’yî weçînitişê şaristanî de 15 hezarî û 919 rayî, HDP’yî zî 15 hezarî û 381 rayî girewtî. Ancax HDP’yî netîceyanê 103 sindoqan rê û 2 hezarî û 500 rayê ke ameyê betalkerdene rê îtîraz kerd.

Heyetê Weçînitişî yê Bajarî îtîrazê HDP’yî ser o kombîyayîş viraşt la îtîraz red kerd. HDP do îtîrazê xo bero YSK’yî.

Weçînitişanê qezaya Milazgirî yê Mûşî de zî seba ke mabênê AKP û HDP’yî de tena 3 rayî estbî HDP’yî seba ke 432 rayê ke ameybî betalkerdene Heyetê Weçînitişî yê Qeza rê îtîraz kerd. La Heyetê Weçînitişî yê Qeza yo ke îtîraz ercna îtîraz red kerd. Nê qerarî ser o do muracatê Heyetê Weçînitişî yê Bajarî bêro kerdene.

Yeno vatene ke hetê Heyetê Weçînitişî yê Bajarî û yê Qeza ra redkerdişê muracatê îtîrazî yê HDP’yî de zextê walîyê Mûşî Îlker Gunduzozî bitesîr bîyo. Hewna ke netîceyê weçînitişî nêbîbî net bi hawayêkê balkêşî Gunduzozî namzedê AKP’yî Feyat Asya zîyaret kerdibi.

Bi tewrbîyayîşê hemsereka pêroyî ya HDP’yî Pervîn Bûldane û parlamenterî Huda Kaya û Garo Paylanî ewro do saet 11.00 de banê Organîzasyonî yê Bajarî de derheqê netîceyanê sindoqan de û muracatanê îtîrazî de kombîyayîşê çapemenîye bêro viraştene.