Hemserekê DEM Partî yê Amedî Abbas Şahînî derheqê qirkerdişanê xozaya Kurdîstanî yê bi destê dewlete de ANFyî rê qisey kerd.

Şahînî bale ante ser ke dewlete seba ke meseleya kurdan çareser nêkera konseptê cîyayî vistê dewre û vat: ''Cografyaya Rojhelatê Mîyanênî û Mezopotamya de her tim hêrişê îşxalî est bîyê. Qetilkerdişê xoza parçeyêkê nê hêrişan ê. Îqtîdarî binê nameyê 'awbendanê asayîşî' de Kurdîstan de bi desan awbendî viraştî. Bi nê awbendan ziwan, kultur û warê cuye yê şarî yenê qetilkerdene. Merdim neçare manenê ke koç bikerê. 

Kurdîstan de şar dîya koçkerdene, asîmîlasyon ame kerdene la rixmê ney zî şar hertim bi ziwan û kulturê xo ciwîya. Îqtîdar nika bi pêro îmkanê xo xîret keno ke cografyaya Kurdîstanî çin bikero. Seba ney zî bi her hawayî polîtîkayanê talanî visneno dewre. Qetilkerdişê xoza zî parçeyêkê nê polîtîkayan o. Kurdîstan de bi destê leşkeran û qoricîyan xoza yena talankerdene. Ancî şewatî zî hetê leşkeran ra yeno vetene.''

Şahînî vist vîrî ke Gelîya Godernî ya Farqînî yena çinkerdene û dewe Pasûrî yenê xalîkerdene. Şahînî vat: ''Zengînîyê erdê Kurdîstanî, mîrasê ci yê kulturelî, çimeyê ci yê awe yenê çinkerdene. Heskîf de tarîx binê awe de ame verdayene. No çi ferasetê dewlete yo. Ma zanenê ke dewlete nê babetan de huqûqî zî goreyê xo şuxilnena. Qanûnî destê nînan de yê, tira netîce do nêra girewtene. Rayîrê tewr xurt têkoşîno şarî yo rêxistinkerde yo. Ma Pasûr de ddî wexto ke şar bi rêxistinî têbigêro her çî vurîyeno. Ma do şarê xo reyde têkoşîn bikerê û bi rêxistinî têbigêrê.''

Şahînî vat ke qet yew sîstem nêeşkeno verê têkoşînê şarêkê rêxistinbîyeyî de ser bikewo û wina dewam kerd: ''Şarê ma dewlete û îqtîdarî ra hêvî nêkeno, cuya xo bi xo domînena. Şarê ma herême de bi heywankarî û zîretî debara xo keno. Şarê ma nêwazeno ke erd û wareyê xo biterikno. Coka do nêverdo xozaya ci bêra talankerdene. Kurdîstan merkezê xoverdayîşî yo.''