Xeylêk bajaranê Kurdîstan û Tirkîya de serkêşîya HDP, HDK, DBP, ÎHD, TJA, MEBYA-DER, TUAY-DER de  şar vera hêrişan kîmyewîyan ê dewleta tirke vejîya waran û nêrazîbîyayîş mojna.

Îstanbul de şaro ke Medanê Şîrînevlerî de ame têhet hetê polîsan ra gerîya binê ablûqa.  Polîsan Hemserekê HDPyî yê Îstanbulî Ferhat Encu zî tede nizdê 40 kesan pê derbkerdişî destbend kerdî. Wekîlê HDPyî yê Îstanbulî Musa Pîrogluyo ke xeylêk wext binê ablûqaya polîsan de mend eşkerayîye wend. Pîrogluyî ard ziwan ke şuxulnayîşê çekanê kîmyewîyan sûc o û vat: ''Ganî her kes vera nê vejîyo. No sûcê şerî yo. Eke  dewleta tirke ra hesabê sûcanê ci nêro persayene, tarîx do şaranê Tirkîya ra hesab biperso.  Vervejîyayîşê çekanê kîmyewîyan vera şerî pawitişê haştîye û vera mergî pawitişê cuye yo.''

Amed de zî şar Parka Koşuyolu yê Baglarî de ame pêser. Polîsan destûr nêda çalakîye. Mayanê Haştîye nêrazîbîyayîş mojna û vat: '' Şima pê mirnayîşî nêeşkenê kurdan biqedinê. Hûma heqê ma şima de meverdo.'' Şar ravêrt verê banê MEBYA-DERî û tîya eşkerayîye daye. Eşkerayîye de nê ameyî vatene: ''Pê çekanê qedexeyan ê ke sûcê şerî hêrişî yenê kerdene. Nîsana 2021î ra nata bi hewayêkê sîstematîkî gazê kîmyewîyî, nukler, bombayê termobarîkî, gazê hardalî yenê şuxulnayene. Tay dîmenanê ke ameyî weşanayene de eşkera yeno vînayene ke nê qazê ke mirnenê yenê şuxulnayene. La rixmê nê dîmenan welatanê ke morê ci binê Pêkerdişê Cenevre de esto bêveng manenê û benê hemkarê sûcê merdimîye. Başûrê Kurdîstanî de şaro ke nizdîyê waranê pêkewtişan de qerqilîyeno. Pê nê gazan têna vera merdimîye nê vera xoza zî sûc yeno kerdene. Ganî goreyê Pêkerdişê Cenevre bêro têgêrayene û OPCW ganî cade heyetêk bişawo herême.

Rayna Dêrsim, Êlih,Şirnex,Agirî, Wan, Mêrdîn, Xarpêt,Riha,Adana, Mersin, Dîlok û xeylêk bajaranê bînan ê Kurdîstan û Tirkîya de hêrişê kîmyewîyî yê dewleta tirke ameyî şermezarkerdene û semedê wayîrvejîyayîşê gerîlayan ame vengdayene.