Se ke yeno zanayene Leyla Guvene seba ke tecrîdê sere Rayberê Şarê Kurdî Abdullah Ocalanî bêro wedaritene 8’êTeşrina Peyên a 2018’î de dest bi çalakîya grevê vêşanîye kerd û çalakîyê grevê vêşanîye bi serkêşîya aye her hetê dinyaye ra bîyî vila û nê çalakîyî hîna zî yenê domnayene. Şarê Çewlîgî ra çend kesan derheqê grevanê vêşanîye de röportaj da ANF’yî.

’Wa Leyla Guvene û çalakwanê bînî yê hepisxaneyan biciwîyê’

Azîz Bazencîr: Ma qisewete de yê, bi mengano ke domanê ma çalakîya grevê vêşanîye de yê û vengê înan ver her kesî xo kerdo kerr. Çar çalakwanan seba ke tecrîd bêro wedaritene xo feda kerd. Ez venga dewlete dana ke wa goreyê hîqûqê xo tê bigêro. Ma hetkarîye danê Leyla Guvene û aye het de yê. Çewlîg de şarî ser tedayê pîlî estê. La ma do bi ruhê xoverdayîşê çalakwanan, 31’ê Adare de cewab bidê hukmatî. Wa Leyla Guvene û çalakwanê bînî yê hepisxaneyan biciwîyê”

 ‘Çalakîyî do her ca bigîrê xo ver’

Hatîce Kavrane: “Dewlete bi tecrîdî hîqûqê xo kena binpay. Kam beno  wa bibo, ganî kes nêro tecrîdkerdene. Çalakwanî tena yew çi wazenê û o zî hîqûq o. Çalakîya grevê vêşanîye bi destê Leyla Guvene ameye destpêkerdene û ewro pêroyê dinyaye ra bîya vîla. Eke talebê çalakwanan ke nêrê ca, çalakîyî do hîna bibê zêde û pêroyê komele do warizo payan ser. Çewlîg zaf keweno xo ver, xemgîn o,çunke kesê ke grevê vêşanîye de yê domanê Çewlîgijan ê. Çewlîg do heta peynîye paştdarîye bido domananê xo û erjanê xo rê wayîr bivejîyo. Ma şarê Çewlîgî hetê Leyla Guvene gênê. Ganî her ca de her kes Leyla Guvene rê bibo veng. Eke vengê ma ke nêbo berz, domanê ma do hepisxaneyan de bimirê.”

 ‘Ma do bibê vengê înan’

Nîhat Aksoy: “Hikumat Çewlîg de bi polîtîkayanê cîyayan wazeno ke herême binê kontrolê xo de bigîro. Çewlîg de rojdemê şarî çalakîyê grevê vêşanîye û tecrîd o. Tecrîd sûcêko vera merdimahîye yo û seba naye zî çalakîye grevê vêşanîye heqêko meşru yo. No rayîr de ma domanê xo kerdî vîndî. Wexto ke keyeyê Zulkuf Gezenî Leyla Guvene ziyaret kerde, zerrîya ma dejaye. Ma nêwazê ke kes bimiro. Wexto ke ma teber de bêveng manenê, girewteyî kewenê dewre û barî gênê xo ser û rolê xo yê tarîxîyî anê ca. Ma do bibê vengê Leyla Guvene û xoverdayoxanê bînan.”

 ‘ Ganî her kes rawirzo payan ser’

Selahattîn Kolû: “Çalakîya Leyla Guvene kewte roja 142’yî û grevê vêşanîye her ca ra benê vila. Ma şarê Çewlîgî bi qisawet û xemgînê.  Vera nê çalakîyan bêvengîye şermê dinyaye yo. Ganî hukmat êdî bikewo dewre û goreyê hiqûqî tê bigêro. Hepisxaneyan de merdimê ma mirenê û her kes bêveng maneno. Na bêvengîye do heta keyî dewam bikero!! Ma wazenê ke tecrîd bêro wedaritene. Ez venga şarê Kurdî dana û vana ganî ma seba Rayberîya xo rawirzê payan ser û nê tecrîdî bişiknê.”