Kampanyaya boykotê berhemanê Tirkan her ke şino, beno pêt.  Herêma Behdînanî de hemwelatîyê na herême dest pê boykotkerdişê berhemanê Tirkan  kerd û vat: "Dewleta Tirkan şarê ma qetil kena, ma nêverdê ke ekonomîyê ma ci rê bibo hempar."

Derheqê hemleya boykotê berhemanê Tirkan de ma îdareyê kampanya reyde qisey kerd
Rêvîng Kurdistanîyî ajansê ma rê vat: "Armancê kampanyaya ma vera îşxalkarîya Dewleta Tirkan tewirêk mojnayîş o. Pereyê nê berheman ekonomîyê şerî rê hetkarî kenê. Ma wazenê bi kampanyaya boykotî Tirkîya rê tedaye bikê. Ganî dişmen baş bizano ke eke ê hêrişê ma bikê ma zî bi rayîrê ekonomîyî do hêrişê înan bikê."

Dilovan Zêbarîyî vat: "Bi hêrişanê Rojawanî Dewleta Tirkan wazena ke Kurdêk nêmano. La hêrişê Tirkîya do bênetîce bibê. Çunke ê kesê ke vera Tirkîya şer kenê wayîrê îradeyî yê. Nika hewceyê Rojawanî bi ma esto, ganî ma wezîfeyanê xo bîyarê ca."

Ebdirehman Şukrîyî vat: "Mabênê parçeyanê Kurdîstanî de cîyatîyêke çin a. Ma pêro Kurd ê, ma hêrişanê ke Rojawanî rê yenê kerdene, şermezar kenê. Eke ma nêeşkenê şervananê ma de  pîya şer bikê zî, ma zî bi boykotê berheman ekonomîyê Tirkîya do qels bikê."