Weçînayîşî rê rojêk mend û partîyê sîyasî ewro heta saete 18.00 eşkenê aktîvîteyanê xo yê propaganda do dewam bikerê. Ewro şan ra dima qedexeyê weçînayîşê do dest pêbikerê û heta siba şan saete 21.00 dewam bikerê. Dêrsim de partîyê sîyasî xebetanê xo dewam kenê û ma zî Dêrsimijan ra weçînayîş persayî. Tayê înan  netîceyê weçînayîşî bi meraq pawenê û tayê înan zî çîyê ke dima weçînişî  do bibê qesawet de yê. Dêrsimijan ê ke weçînayîş ercnayo ard ziwan ke weçînayîşî mabênê Yewîya Hêzî ya Şorişgêre ya Dêrsimî û TKP’yî de do bibo.

Ma de hal nêmend ke ma weçînayîşî bifikrê

Hemwelatijan ra Ergîn Altîkî ard ziwan ke bajar de heycanê weçînayîşî çin o, şar zêdetir fikirîyeno ke weçînayîşî ra dima çi înan paweno.  Altîkî vat, teberê HDP’yî de sewbînana partîyêk  waştişanê şarî nêana ca û şar teyna ey  xo ra nêzdî vîneno raya xo dano ci vat; “31’ê Adare de HDP do ser bikewo.”

Partîya şarî ya

Berîvan Gungormuşe ard ziwan,  a biheyecan a û şewe hewn çimanê aye nêkeweno û vat, “Qetî HDP do ser bikewo. Ez zî do raya xo bida HDP’yî.  Her çîyî ra ver ez xo HDP’yî ra zaf nêzdî vînena. Seba ke HDP heme şarî temsîl keno, ez wazena wa ser bikewo.”

Ez netîceyan biheycan pawena

Muhammet Kulu yo ke wendekar o ard ziwan ke, o bi zerrî û can  wazeno ke HDP ser bikewo û vat, “Vera qeyûm o ke ameyo tayînkerdene de ez wazena ke Yewîya Hêzî ya Şorişgêre ya Dêrsimî ser bikewa. Ma ciwanî wazenê şar şaredarîye îdare bikero.  Ez netîceyê weçînayîşî bi meraq pawena. Çunke  weçînayîş mabênê TKP û Yewîya Hêzî ya Şorişgêre ya Dêrsimî de do bibo. Labelê ez nika ra bawer kena HDP do ser bikewo.”

Rayî Yewîya Hêzîye rê

Hemwelatijan ra Ezgî Çaglare ard ziwan, vera qeyûman ê ke ameyî tayîmkerdene de a do raya xo bida HDP’yî.  Çaglare waşt, sere de wendekarî, her kes 31’Adare de raya xo bi Yewîya Hêzî ya Şorişgêre ya Dêrsimî.

HDP şansêko gird o

Ozgur Ayîşî zî ard ziwan ke Dêrsim de hemberîyêka weçînayîşî ya biheyecane esta û no weçînayîş mabênê TKP û HDP’yî do bibo, labele bawerîya ey esta ke 31’ê Adare de HDP ser bikewo. Ayîşî ard ziwan, o raya xo do bido HDP’yî û vat, “Vera sîstemî ganî her kes dorê HDP’yî de bêro tehet. HDP seba nê welatî şansêko zaf muhîm o. Dêrsim de serkewtişê HDP’yî ra tewr gumanê ma çin o.”