Hemwelatîyanê Mexmûrî hêrişê dewleta tirke yo ke tede hetê teyarayanê SÎHA ra Mexmûr de 3 cinîyî ameyî qetilkerdene nêrazîbîyayîşê xo mojna û vengdayîş kerd ke dewleta tirke û hemkarê ci do nêresê armancanê xo.

Endamê Karê Têkilîyanê Teberî yê Mexmûrî Mehmud Manak: ''26 serrî yo ke ma multecî yê. Ma sey multecîyê sîyasîyî ameyî qebulkerdene. Rixmê ney zî zaf rey ma hedefê hêrişan bîyî û statûyê ma yê multecîtîye visîya binê tehlukeyî ke Neteweyê Yewbîyayeyî destê xo multecîyanê Memxûrî ra biancê. Tim vera kampe hêrişî estbî. Serra 2017î ra nata zî hêrişê vera ma zêdîyayî. Hukmatê Iraqî pê eşkerayîyan hêriş şermezar keno la pratîk de netîce nêgêno. Eke raşt a zî Iraq nê, hukmatê Herême û Neteweyê Yewbîyayeyî paştî bidê ma destûr nêdayêne ke hêriş bibo.

Hemwelatîya Mexmûrî ya bi nameyê Evîne Taybogan vat: ''Ez nê hêrişî şermezar kena. Wextê vîrusî de zî dewleta tirke dişmenîya kurdan ra fek vera nêdana. Ma fikirîyenê ke ma xo vîrusî ra yan zî teyarayanê dewleta tirke ra bipawê. Armancê înan îşxalê erdê Kurdîstanî yo. Tirkîya nêeşkena bê destûrê Herêma Kurdîstanî û hukmatê Iraqî  hêrişê ma bikerê. Ge ge dewleta tirke ge ge zî DAÎŞî  hêrişê şarê Mexmûrî kenê. Çira Neteweyê Yewbîyayeyî wezîfeyê xo nêanê ca? Ez destpêk de venga hukmatê herême û hukmatê Iraqî danê ke wa berpirsîyarîyê xo bîyarê ca.