Dewleta tirke ya îşxalkere vizêr Kampa Multecîyan a Şehîd Rustem Cûdîyî ya Mexmûrî de keyeyêk da bombayan ver. Badê bombardumanî şar vera hêrişî rayraşîyayîş kerd.

Rayraşîyayîşo ke verê Dezehê Keyeyanê Şehîdan de dest pêkerd heta verê banê Neteweyanê Yewbîyayeyan dewam kerd. Badê rayraşîyayîşî Hemsereka Meclîsê Şarê Mexmûrî Filize Budak qisey kerd.

Filiz Budak hêrişê dewleta tirke ya îşxalkere şermezar kerdî û nê vatî: ''Ewro banê dayîkan ke bi serran o sembolê haştîye yo hetê dewleta tirke ra bi droneyan û teyarayan dîya bombayan ver. Waştişê her herîşî oyo ke şar verê înan de çok bido û herra xo ra vejîyo. 2023 de HPGyî eşkerayîye daye û vat ê eşkera na herême ra xo peyser ancenê. Iraq û dewleta tirke zî na rewşe zanê. La rixmê heme raştîyan hêrişê xo domnenê. Hedefê nê hêrişan şiknayîşê îradeyê şarê Mexmûrî yo ke 30 serrî yo vera nê zulmî xover dano. Ê se kenê wa bikerî no şar do xoverdayîşî cameverdê.''

Filize Budak ard ziwan ke Wezîrîya Maciran û Barkerdişî ya Iraqî 12 rojî yo kampe de kontrolê nasnameyan kena û nê vatî: ''Ê vanê semedê Neteweyanê Yewbîyayeyan nê humartişî kenê. Rixmo ke nê prosesî de kampe de nê heyetî gêrenê hêriş ame kerdene. Bandura Iraqî ha ça de? Êyê ke serê Kerkukî ra semedê menfeatê xo yê sîyasîyî û petrolî teyarayan danê war qey vera hêrişê serê Mexmûrî bêveng ê? Qey 2017î ra nata na kampa ke tede 12 hezar kesî est ê tim dîyena bombayan ver?  Ma bi desan şehîdî dayî, bi des hezaran kesî birîndar bîyî. La hukmatê Iraqî yew nêrazîbîyayîş nêmojna ra. Cunke mabênê çar welatan de bi Pêkerdişê Lozanî vera kurdan pêkerdişo leymin est o. Ewro Mexmûr bîyo hedefo verên ê nê welatan. Ma sey şarê Mexmûrî vera îxanetê Barzanîyan tewirê xo eşkera mojnenê ra. Ma veng danê ke wa vera hêrişanê vera Silêmanî, Rojawan û Mexmûrî xoverdayîşo merkezî bêro kerdene.''