HDPyî weşînayîşê 31ê adare de 65 şaredarîyî vistî destî. Labelê têna 4 şaredarîyê qezayan, 2 şaredarîyê bajarekan bi temamî 6 şaredarîyî destê HDPyî de mendî. Tewr peyên Şaredarîya Qersî rê qeyûm ame tayînkerdene.

Hemsereka HDPyî ya Qersî Sevda Subaşi derheqê babete de qisey kerd û qala rewşa Qersê HDPyî kerde. 

Sevda Subaşi vat: ''HDPyî ra verî Qers de rant estbi, rayîr çinbî. Bi taybetî seba cinîyan Qers de çîyêk çinbi. La dima ke ma şaredarîye viste destî bi kede hemşaredaran Ayhan Bîlhen û Şevîne Alaca Qers newe ra awan bi. Meseleya çopan çareser bîye, îhaleyî goreyê usûlî ameyî kerdene, kooperatîfî ameyî akerdene û nê cayan de girîngîye dîyaye cinîyan. Tay cayan de berhemê cinîyî ameyêne rotene. 

Kapasîteya şaredarîye ya xebitnayîşê karkeran 370 bîye labelê rantî ra 970 karkerî şaredarîye de xebitîyayêne. Tay merdimî estbî ke nêxebitîyayêne la înan de kartê xebatkaran ê şaredarîye estbî. Ma nê kesî karî ra verî. ''

Sevda Subaşi ard ziwan ke dima ke qeyûm ame tayînkerdene Qers vurîya rewşa xo ya verêne û vat: ''Qeyûmî kooperatîfî, konseya şaristanî betal kerî. Qeyûm cayê cinîyan ê sey Merkezê Paştdayîşê Cinîyan ê Şaredarîye û Mor Cafe qefilnayî. Sosyolog û psîkologê ke seba xizmetê cinîyan şaredarîye de bîyî, karê înan ame vindartene. Cinîyan 6-7 mengan de 400 reyan muracatê înan kerdbi. Pêroyînan rê xizmet dîya û cewabî dîyayî persanê înan. Pêro karê HDPyî yê seba cinîyan hetê qeyûmî ra wedarîyayî. Şaredarîya Qersî reyde dest nîya îrade û keda cinîyan zî ser.

Têna weçinîtoxê HDPyî nê weçinîtoxê AKP-MHPyî zî pê tepişîyayîşê Ayhan Bîlgen û 21 kesan û qeyûmî ra qayîl nîyê. Her kes vano na neheqî ya.''