Roniştoxê Wanî mîyanê şertanê bêkarî û feqirîye de yê labelê qeyûmê Wanî Mehmet Emîn Bîlmez her menge Wan de bi tewrbîyayîşê îdarekaranê dewlete şayîyan virazeno.

Mabênê Tirkîya û Îranî de bi nameyê ''Kombîyayîşê Komîteya Asayîşî yê 55. '' kombîyayîşê asayîşê sînorî ame kerdene û bi nê hawayî nêno destûrdayene ke şarê herême bazirganîye biko. Walîyê Wanî Mehmet Emîn Bîlmezo ke Şaredarîya Şaristanê Pîlî ya Wanî rê sey qeyûmî ame tayînkerdene, bi leşkeranê Îranî û îdarekaranê dewlete reyde seba astengkerdişê bazirganîya sînorî kom bi. Kombîyayîş de seba ke şarê herême nêeşko bazirganîye biko hîn peymanî ameyî amadekerdene. Înan pêkerd ke seba astengkerdişê bazirganîya sînorî bêra girewtene, sînor de dewrîyeyo hempar bêro xebitnayene û yewbînan de têkilîye bikê.

Îranijî Wan û şaristanan û qezayanê dormeyan de bi paştdayîşê AKPyî babeta ekonomîyî de xurt benê. Walî û qeyûmê Wanî Mehmet Emîn Bîlmezo ke seba şarê herême bazirganîye qedexe kerde, her tewir firsendî pêşkêşê bazirgananê Îranî kerdî.

Wan de nêzdîyê hezar 120 roj ê ke çalakîyê demokratîkî qedexe yê. Bi desan kurdê ke qezayanê sînorî Elbak, Bêgir, Qelqelî û Saray de bazirganîye kerdêne hetê dewleta tirke û Îranî ra ameyî qetilkerdene. Bi seyan kurdî zî birîndar bîyî. Mal û heywanê bi hezaran dewijanê herême ameyî destsernayene. Îranijî Îran ra yan zî Wanî ra bi tonan eşyayî sînorî ra bi asanî derbaz kenê.

Roniştoxê Wanî mîyanê şertanê bêkarîye û feqîrîye de yê labelê Mehmet Emîn Bîlmezo ke hetê îqtîdarê AKPyî ra seba Şaredarîya Wanî sey qeyûm ame tayînkerdene her menge Wan de bi tewrbîyayîşê îdarekaranê dewlete şayîyan virazeno. Qeyûmê Wanî dima ke Şaredarîya Wanî rê ame tayîkerdene şaredarîye vist binê deynan û nêeşkeno meaşanê karkeran zî bido la kasaya şaredarîye ra şayîyan serûber keno.